Aizawl: Mizoram Legislative Assembly pariatna thutkhawm vawi 11-na, February 28 thleng awh tur chu nimin khan tan a ni.
Session tan a nih veleh Mizoram Larsap Hari Babu Kambhampati-a’n thu a sawi a, sorkar flagship programme SEDP phase I kalpui mek a nih thu leh a thawh khatnaah chhungkaw 60,000 hnenah Rs 25,000 theuh pek a nih tawh thu sawiin, hemi atan hian Rs. vaibelchhe 150 sen a nih tawh thu a sawi a. A thawh hnihna tur buaipui mek a nih thu leh tanpuina dawngtuten Rs 25,000 theuh an dawn leh tur thu sawiin, SEDP phase I chu kumin March thlaa zawh fel tum a nih thu a sawi.
Larsap chuan kum 2022 chhunga Mizoram atanga thlai leh thil dang thar chhuah dan sawiin, silk MT 68.241 thar chhuah a nih thu te, dragon fruit chingtuten MT 312 an thar thu leh Rs. vaibelchhe 6.24 an lei thu te, lakhuihthei MT 29023 thar a nih thu leh UAE leh Qatar-ah te thawn chhuah a nih thu te a sawi a. Tomato, zikhlum leh dawnfawh lamah pawh hmasawnna a nasat thu a sawi.
Sorkarin ram humhalh nan theihtawp a chhuah thu pawh sawiin, “Mizoram leh Assam inrina velah police-te awmna tur Rs nuai 327.56 senga sak a ni,” a ti a. State dang nena inrina hmun hrang hrangah SEDP suma in eng emaw zat sak a nih thu leh sum sen zat Rs. nuai 495.41 ni tura chhut a nih thu a sawi.
Assam nena inrina vela security camp hrang hrangah SEDP sum Rs. nuai 96.50 hmanga water supply scheme duan a nih thu larsap chuan sawiin, zirna lama sorkar hmalakna te, infiamna hmunhma din belh chungchang te a sawi bawk.
Budget session hi vawiinah chhunzawm leh a ni dawn a, inkhawm hnuhnung ber leh tun inkhawm inkara member hlui thite sunna leh deputy speaker thlanna hun hman a ni ang.
February 13-ah house leader, chief minister, finance changtu ni bawk, Zoramthanga’n kum 2023 leh 2024 inkar tangka kuma Mizoram sum ruahman (budget) a pharh dawn a, hemi rual hian tangka kum kal lai atana sum indaih lohna phuhrukna tur (supplementary Demands for Grants for the year 2022-2023) a pharh dawn bawk a ni.