Indian mi pahnih, an nihna inthlak (transgender) inkawpten nau an pai tih tihlanna thla an lak chu tun lai hian social media-ah a darh nasa hle.
Kum 21 mi, Ziya Paval leh a kawppui, kum 23 mi, Zahad te hi chhim lama Kerala-a cheng an ni a, an nihna inthlak tuma hma an lak mek laiin nau an pai ta a ni.
Paval-i hian fa neih a duh thu a sawi tawh thin a, a tirah mipaa piang niin tunah erawh chuan hmeichhia a ni tawh.
Zahad-a ve thung hi hmeichhiaa piang a ni a, tunah chuan mipa a ni tawh thung a. Ani hi tuna nau pai mek zawk chu a ni a, nau an hrin thuai beisei a ni.
An thlalak an pho chhuah hnuah hian an social media page hrang hrangah lawmpuitu an tam hle.
“Nihna inthlakte hian chhungkaw neih an phu,” tiin anmahni ang bawka inthlaka hmeichhe lemchan thiam ni ta, S Negha chuan Paval-i’n Instagram-a an thlalak a dah chu a comment.
Paval-i leh Zahad-a te chuan an thil tawn ang chu India-ah chuan thil thleng zen zen loh a nih thu sawiin, “Nihna inthlak zingah anmahni fa ngei hring an la awm meuh lo a ni,” a ti.
India-ah hian transgender hi mi maktaduai hnih vel an awm a, activist-te chuan hei aia tam daih hi a tak takah chuan an nih an ring a. Kum 2014 khan Supreme Court chuan nihna inthlakte hian inthlak ve lote ang bawkin dikna chanvo (right) an nei tiin thu a lo titlu tawh.
Heti chung hian kawng hrang hrang, a bikin zirna leh damdawia inenkawlna kawngah harsatna an tawk nasa tho va, endawng leh nuihzat an tawng hnem hle.
Paval-i leh Zahad-a te hi kum thum kal taa intawng kha niin an chhungte ve ve atanga inlahranga awm dun an ni.
“Muslim ruh tak chhungkuaa sei lian ka ni a, classical dance ka zir takngial pawh phalsak ka ni ngai lo,” tiin Paval-i chuan a sawi a. “Ka nu leh pate hi an uchuak hle thin a, lâm ka zir theih loh nan hian ka sam pawh tawi takin min tansak thin,” a ti.
Paval-i hian youth festival-a tel ve tura a chhuak chu a haw ta lo tih a sawi.
Lâm pawh transgender community centre-ah a zir zui a. Tunah hian Kozhikode district-ah a zirtirtu a ni mek tawh.
Zahad-a hi accountant inzir chhuak niin Thiruvananthapuram khawpuia Kristian chhungkuaa sei lian a ni a, tunah hian supermarket-ah a thawk mek.
A nihna inthlak a duh avangin an chhungkua a chhuahsan a; mahse, nau a pai takah hian a chhungte pawh an lawmin an lawmpui hle tih a sawi.
“Zahad-a hi nau a pai chiah hian a chhungte pawhin an buaipui hle a ni,” tiin Paval-i chuan a sawi.
Zahad-a nu hian a tirah chuan nau an pai tih chu vantlang hriatah tilang lo turin a duh hle a. Phalna a pek hnuah kar hmasa khan an Instagram page-ah an thlalak an dah chhuak ta chauh a ni.
Paval-i chuan ama chhungte bik chuan tun thlengin ngaihvenna an la nei lo tih a sawi.