Thailand hmar lamah tuichhunchhuah zim taka naute tla palh chu mak taka chhan chhuah a ni.
Thla 19 mi lek naute hi Myanmar nena an inrina bul lawk, Tak province-ah metre 13 (42ft)-a thuka khurah hian Thawhtanni chawhnu khan a infiam a tla palh a ni.
Naute nu leh pa, a bul lawk lova hna thawkte chuan thuneitute hnena an thlen hnuah chhan chhuah tumin zankhuain an bei a ni.
Dama lak chhuah a nih hnuah hian hliam tenau a tawrh avangin damdawi inah lak nghal a ni.
“Nikhua a hre lo va; mahse, a taksa pengte chu a tha vek a ni,” tiin tual chhung police chief Ratsaran Ketsoising chuan AFP a hrilh.
A nu leh pa hi Myanmarese nia sawi an ni a, cm 30 bial vel leka an fanu a tlak hnuah hian an chiai nasa hle a ni.
Naute nu leh pa hi Khiri Rat sub-district-a tapioca farm-a thawk an ni a, hna an thawh hlan hian an bul hnai thing buk hnuaiah an awmtir mai niin an insawi.
An chawlh laiin naute chu an hmu mai ta lo va, a bula khur atangin a tap ri an hre ta a ni.
Chhanchhuah hna thawktute chuan zan khuain khawl nen hna an thawk a, metre 10 vel zeta thukin a tlakna khur bulah chuan lei an lai a ni.
Khurah hian naute thawkna turin oxygen pek luh a ni a. An hna thawk lai thlalak thehdarhah chuan lukhum khawng tak nen an lei laih khuar mawngah chuan an awm hlawm a ni.
Thuk tak an laih hnuah hian khawl hmanga an chet zel chuan naute tanna khur chu a chim mai an hlau va, kutlawngin suahdur nen an metre eng emaw zat an lai zui leh ta a ni.
PBS Thailand chuan chhanchhuah hna thawktute hian Thawhlehni zing dar 8:00 (India-a zing dar 6:30) velah naute hi an lai thleng thei ta a; mahse, awlsam takin an la chhuak thei mai chuang lo va, a ke-ah hliam a tuar niin a lang.
Hun eng emaw chen an beih leh hnuah naute hi an la chhuak thei ta a, lawmna thawm pawh a ring hle a ni.
“Him taka kan la chhuak thei hi kan lawm tak zet a ni,” tiin an zinga pakhat, Chanachart Wancharernrung chuan thuthar lakhawmtute hnenah a sawi a. “Nimin chawhnu atangin kan bei tawh a, zan pawh kan mu lo va, theihtawp kan chhuah a ni,” a ti.