Premier League club Leeds United chuan an manager Jesse Marsch chu kum khat pawh an chhawr hma in Thawhtanni zan khan an ban.
Leeds hi Pathianni zan khan Nottingham Forest nen inkhelin 1-0 in an tlawm a. A zawnin Premier League-ah match sarih khelin chak hmel an hmu tawh lo.
Premier League table-ah 17-na an ni mek a, goal difference hmangin relegation zone chungah an awm hram. November ni 5 hnuah league-ah hnehna an la chang leh lo.
Season liamta khan 17-na an ni a, nikum February thla khan American coach Marsch hi Marcelo Bielsa thlak turin an lalut.
Chiang zawkin
Club in an manager an ban thu sawiin, “Jesse leh a coaching staff te chungah an hnathawh zawng zawngah lawmthu kan sawi duh a, an hmalam hun zel atan duhsakna kan hlan.”
“Head coach thar lalut turin hmalakna a kal tan a, kan club tantute hnenah kan hmalakna a kal chhoh dan hi kan hriattir zel ang.” tiin coach thar an zawn nghal thu an sawi tel.
Marsch-a coaching staff a awm mek Rene Maric, Cameron Toshack leh Pierre Barrieu te chu ban an ni bawk.
Engtin zel?
Leeds United hian zanin leh Pathianni zan hian an hmelma Manchester United a zawnin an hmachhawn dawn. Zanin inkhel tur atan hian inbuatsaihna chu coach Michael Skubala, Paco Gallardo leh Chris Armas te kutah a awm ang.
Armas hi Manchester United a Ralf Rangnick-a coaching staff a tel thin a ni a, kar hmasa khan assistant manager a lakluh thar chauh a ni.
Marsch thlak tur hian Bielsa hnuaia assistant coach lo ni tawh Carlos Corberan hming chu a ri ring hle.