Aizawl : Sorkar laipuia Ministry of Tourism ruahmanna bawhzuia Mizoram sorkara Tourism deptt-in a taka kalpui theih tura hma a lak mek State Institute of Hotel Management (SIHM), Bung Bangla ami chu nimin khan Tourism Minister Robert Romawia Royte hovin a kaihhnawih sorkar mipawimawh ten an tlawh.
Tourism Minister hova SIHM tlawhtu MYC Chairman Dr Vanlaltanpuia, Industrial Development Board Vice Chairman K Laldawngliana, HPC Vice Chairman Lawmawma Tochhawng, Horticulture Board Vice Chairman Prof. F. Lalnunmawia leh Tourism deptt. hotute chuan tunhnaia Tourism ministry atanga sum hmuh Rs nuai 200 hmanga bungbel leh hmanraw dang lei tharte an enho a, hmalakna hrang hrang thlirhovin an sawiho bawk.
SIHM building sakna tur sum chu MNF sorkar hmasak lai kum 2008-09 ah Rs nuai 800 sanction a nih thu Tourism Minister Robert Romawia Royte chuan sawiin, kum 10 chuang hnua Zoramthanga kaihhruai sorkar a din leh hnu kum 2019-ah SIHM danin a phut angin Cabinet-in SIHM atan posts 32 siamin, a taka kalpui tura hmalak zui a nih thu a sawi.
Tourism Minister chuan SIHM chu Mizoramin a mamawh a nih avangin sum harsatna khirh tak karah pawh a taka kalpui dan tur sorkarin a ngaihtuah mek thu a sawi a. Hmabak la tam viau mahse, kuminah eng course ber emaw chu tan theih an beisei thu a sawi bawk.