Aizawl : Mizo National Youth Front (MNYF) Headquarters’ Office Bearers leh Aizawl khawpui chhung a MNYF Block 13 hruaitute chu nimin khan MNYF Headquarters office-ah thil pawimawh hrang hrang ngaihtuahin an thukhawm.
He hun hi MNF Vice President Vanlalzawma’n hman pui thu a sawi a. MNF hi a din tirh atangin thalaite din a nih thu leh, MNF nungphung hi thalaite a ni a, kumin kumtawp inthlan pawh hi thalaite kutah a awm tih a sawi.
Vanlalzawma hian, political party dangin MNF inrelbawlna ang hi an nei ve lo tih sawiin, “MNF chuan hnam thinlung pu in ram kan kaihruai a ni. MNF innghahna hi India Nationalism a ni lo a, Mizo Nationalism a ni. Kan danglamna bik hi thalaiten an hriat thar zel a tul a, MNF hi Mizote innghahna lungphum a nih zel theih nan thalaite’n nasa zawka ke kan pen a tul a ni,” a ti.
Thusawitu dang MNF |halai Vice President Zodinpuia chuan, hripui leng avanga sorkarin sum leh paia harsatna a neih hi chhuanlam a ni lo a, thil thleng dik tak a ni tia sawiin, “Sorkarin sum leh pai enkawlna kawngah inrenchemna nasa takin a kalpui a, RBI in statement a tihchhuah thar berah phei chuan Mizoram chu India ram state 29 zingah sumfai a leiba nei tlem ber pahnihna kan ni,” a ti.
Zodinpuia chuan, India ram state dangte GSDP tisangtu ber pakhat chu Industrial sector-a a nih thu sawiin, Mizoramah chuan hnamdangte an duh ang anga an rawn luh theih lohna tur leh sumdawnna an rawn kalpui theih lohna turin Inner Line Regulation hman a ni a. Mizoram leh hnam himna tur anih chuan state GSDP lo hniam deuh mah se, MNF chuan hnam himna an dah pawimawh hmasa zawk tur a nih thu a sawi bawk.