Turkish President Recep Tayyip Erdogan chuan mi sang tam tak an thihna lirnghing tuar na zual province 10-ah thla thum chhung emergency a puang.
Erdogan chuan an rama thi chu mi 3,549 an tling tawh tih a sawi.
An thenawm, Syria-ah mi 1,600 chuang an thi tawh bawk.
Television-a thuchah a sawi tihchhuahah Erdogan chuan emergency puan hi an ram chhimchhak lama chhan chhuah hna ‘rang taka thawh’ a nih theih nan a nih thu a sawi.
Emergency puan hian chhanchhuah hna thawhna bakah sum lama a tuartute puihna pawh a huam dawn tih a sawi a, puih dan tur kimchang erawh a sawi lo.
Emergency hi inthlan hma lawk, May 14-ah a tawp dawn tihna a ni a, inthlan turah hian Erdogan-a hian kum 20 zet thuneihna a chan tawh chan chhunzawm leh a tum a ni.
Turkey-in emergency a puan hnuhnung ber chu kum 2016 kha niin sipaiten sorkar lak an tum an hlawhchham tum kha a ni a. Kum hnih hnuah hlih a ni.
Thawhtanni khaw var hma deuhva lirnghingah hian ruah nasa taka sur leh vur tla karah chhanchhuah hna thawktute chuan chhun zan zawmin dam chhuak zawn hna an thawk mek zel.
Chhanchhuah hna thawktuten mak tak taka dam chhuak an chhan chhuah mek laiin World Health Organization chuan thi zat hi an pun zel a rinawm thu a sawi.
Chhim lama Adana khawpuiah chuan zanah pawh khawl lian tak nen in chim hnawk leh slab chim te an hai.
Adana-ah hian mi chengte hi pawnah vek an awm rih a. Chenna in chân lote pawh nghing nawn leh (aftershock) hlauh vangin an haw ngam rih lo.
Mi thenkhat chu pheikhawk, kawrlum leh phone charger pawh keng lovin an chhuak a. Kartawp lamah hian khua a vawt zual dawn bawk niin an sawi.
US Geological Survey chuan Thawhtanni zing dar 4:17 (India-a zing dar 6.47)-a magnitude 7.8-a na lirnghing hi Gaziantep khawpui bul lei hnuai km 17.9 atanga intan niin an sawi.
A hnuah magnitude 7.5-a nain Kahramanmaras province-a Elbistan district atanga intanin a sawi leh bawk.
Turkey-a Disaster & Emergency Management Authority (AFAD) chuan an chhinchhiahna thar berah chuan damin mi 8,000 an lak chhuah tlin tawh thu leh in chhia 4,700 chuang an awm thu an sawi.
Aftershock a thleng reng a, chhanchhuah hna thawktute hian hmun thenkhatah chuan kut lawngin in chimte chu an hai a; mahse, khaw vawt lutuk avangin hna a sawt thei lo.
Chhim lama Hatay-ah chuan Ghanaian footballer Christian Atsu pawh in chim kar atangin hliam tuar chunga lak chhuah a ni a. Ani hi Newcastle United tan pawha vawi 107 lai lo khel tawh a nih thu a manager Mustafa Özat chuan Turkish radio a hrilh.
Atsu hi Turkish club Hatayspor tan khel mekin club sporting director Taner Savut pawh in chim hnuaiah a la awm thu Özat chuan a sawi.
Lirnghing a intanna bul lawka mi, Osmaniye khawpuiah chuan ruah surin chhan chhuah hna thawh a tikhaihlak nasa a. He khawpuiah hian power a awm lo va, khua a vawt hle a, ruah a sur reng bawk.
Osmaniye khawpuiah hian khualbuk neitu pakhat chuan mikhual 14 an nei a, an zinga pasarih chauh hmuh an la nih thu BBC a hrilh.
Ram hrang hrangte chuan Turkey hnenah hian tanpuina leh chhanchhuah hna thawhna hmanrua an thawn hlawm a. Heng zingah hian specialist team, ui fing leh hmanrua te a tel.
Hetih lai hian lirnghing hian Turkey-a thlawhna tumhmun pawimawh pathum a tichhe tel a, puihna thawnte pawh a thleng zung zung thei lo.
Syria-ah pawh mi 1,600 vel thi an awm tawh a, Turkey nena an inrina lai bawrah mi maktaduai chuang in nei lovin an awm mek bawk a. Tual chhung buaina a tamna lai, helhovin an thunun mek pawh lirnghing hian a sawi nain an tuar na hle bawk.
Turkey hi khawvela lir a nghin duhna ber hmuna awm a ni a. Kum 1999 khan hmarthlang chu na taka sawiin mi 17,000 chuang an thi a. Kum 1939 khan khawchhak lama Erzincan province sawiin mi 33,000 vel an lo thi tawh bawk.
Tun tuma lirnghing hi a sawi zau hle a, Cyprus, Lebanon leh Israel-ah pawh hriat a ni.