Court of Special Judge (Prevention of Corruption Act)-in Tuirial Hydel Project siamna tura ram lakna leh zangnadawmna pek thubuaiah mi paruk thiam loh a chantir a, thubuaia hming lang, tuna UDPA Director H Lianzela leh mi dang pakhat erawh thiam a chantir thung.
Aizawl District Court-a Special Judge (PC Act) Dr HTC Lalrinchhana’n nimin khan thutlukna puangin ram laka thil dik lo tia puh mi pakua zinga paruk – C. Vanlalchhuana, Electric Veng, Aizawl; Saiaithanga Tuithiang, Aizawl; C. Rokhumi, Durtlang, Aizawl; Lalduhawma, Durtlang Leitan, K. Lalrawna, Champhai Bethel leh P.C. Lalthazovi, Durtlang Leitan te chu inthuruala VC ram pass lem siamnaa inhnamhnawihah te, VC ram pass lem hmanga zangnadawmna an dawn theihna tura sorkar thuneitute bumah te, VC ram pass lem, a dik ang taka lantira zangnadawmna dawnga puhnaah te thiam loh chantir an ni.
He thubuaia thil dik lo tia puh, tuna UD&PA Director H Lianzela erawh puh a nihna hrang hrangah te court-in finfiahna a hmuh loh avangin thiam a chantir a. Thuneihna nei hauh si lova VC ram pass pe chhuaka puh, Lalrinsanga, Saipum pawh he thubuai chhuituten finfiahna tha tawk an neih loh avangin thiam chantir niin, he thubuaia hming lang, ram neitua inchhal zinga mi, K. Darkunga, ITI Veng, Aizawl erawh a boral tak avangin a thubuai tihtawp a ni.
Special Judge Dr HTC Lalrinchhana chuan khawtlang nunah sum pai duham luatna a hluar hle nia sawiin, thawhrim rah ni lo, pawisa awlsam umnain ram inrelbawlna leh ram sumpai a nghawng chhe ta hle niin a sawi a. Hlemhletna leh kuttling lova sumpai umnain ram hmasawnna a tithuanawp nia sawiin, “Sorkarin ram a laknaa zangnadawmna dikhlel leh tam uchuakin mipui sum a eiral nasa a, hmasawnna hnathawh tisukuktu a ni,” tiin, “Hetiang thil dik lo tak hi inthuruala mipuiin do tlan a ngai,” a ti bawk.