Aizawl : BJP Mizoram State General Secretary Lalthangmawii’n thawhlehni khan sorkar laipuia Union Minister hrang hrang kawmin, Mizoram hmasawn dan turte leh mamawhte a sawi pui.
New Delhi-a cham mek Lalthangmawii hian Union Railway Minister Ashwini Vaishnaw chu a pisa-ah kawmin, Mizorama rel kawng sial mek te a hun taka zawh a nih theih nan chak zawka hma la turin a ngen a; hetih rual hian rel kawng sialin a paltlang ram neitu thenkhate’n zangnadawmna-a harsatna an tawh mekte pawh court-a inkhin buai ngai loa chinfel dan zawng turin a ngen bawk.
Union Health Minister Mansukh Mandhiviya pawh kawmin, Mizoramah Central Medical College/Regoinal AIIMS din tur chungchang te, Mizoramah a tlem berah Nursing College pathum tak dan tur te leh Mizoram sorkarin PM Ayushman Bharat a bawhzui that theih loh chungchangte a sawi pui.
Union Minister of State for Agriculture, Kailash Choudhary pawh a chennaah kawmin, Mizorama lo neitute harsatna hrang hrang te, PM Kisan Niddhi leh a kaihhnawih dinhmun te, FPO din hmun te, Agriculture Link Road chungchang te, Mizoram in lei tha a mamawh dan leh central quota atanga Mizoram uria pek a nih dan te a thlen bawk.
BJP Mizoram State General Secretary Lalthangmawii thu thlen te hi, Union Minister-te’n bawhzui an tum thu an lo hrilh hlawm a ni.