Nimina assembly thutkhawmah deputy speaker hmun ruak luahtu tur thlan a ni a, chuhtu awm chhun MNF party aiawh, H. Biakzaua chu Speaker Lalrinliana Sailo-in tlingah a puang.
Assembly Speaker Lalrinliana Sailo chuan deputy speaker atana H. Biakzaua a puan hnuah speaker hovin House Leader Zoramthanga, group leader pahnih – Lalduhoma leh Zodintluanga Ralte ten a thutna tur hmunah an hruai a ni.
Deputy speaker thar hian nimin vek khan deputy speaker pisa a luah tan nghal a, pisa luah tanna puala inkhawm tawiah Chief Minister Zoramthanga’n deputy speaker atana Lawngtlai East bialtu MLA H. Biakzaua thlan tlin a ni chu lawmawm a tih thu sawiin, politics-a tawnhriat ngah tawh tak a nih thu te, he hna hi a tlin pawh a rin thu te a sawi.
Assembly Speaker Lalrinliana Sailo pawhin deputy speaker thar a lawmpui thu sawiin, “A thlamuanthlak ka ti a, duhsakna ka hlan a ni,” a ti.
Deputy speaker 17-na ni tura thlan tlin, H. Biakzaua pawhin he dinhmun luah thei tura thlan tlin a nih avanga a lawm thu a sawi a. “He ni hi ka tan leh kan chhungkaw tan ni chhinchhiahtlak leh hriatreng tawh tur a ni,” a ti bawk.
Deputy speaker pisa thar luah tanna inkhawm tawiah hian Deputy Chief Minister Tawnluia, Minister leh MLA eng emaw zat an tel.
H Biakzaua hi Mizoram Union Territory a nih lai atanga chhiarin deputy speaker 17-na a ni a, state nih hnu atanga chhiarin 12-na a ni thung.