Turkey-a lirnghing na tak avangin tunah hian Indian pakhat chu a chin hriat lohvin a awm mek a, mi dang 10 pawh hmun kilkhawr takah an tang mek bawk.
Thawhtanni tuka Syria nena an inrina bul lawk sawitu lirnghingah hian Turkey-a Indian awm mekte chungchang chu Nilaini khan a puang.
Mi 1,1000 chuang thi an awm tawhna lirnghingah hian chin hriat loh pakhat a awm a, mi dang 10 hmun danga tangkhang mekte chu an him tih a sawi.
Foreign ministry chuan Turkey-ah hian Indian 3,000 vel an awm niin a sawi bawk.
“Turkey-a Adana khawpuiah control room siam a ni a. Hmun kilkhawr laiah mi 10 chu an la tangkhang rih a; mahse, an him vek a. Hna thil avanga he ram tlawhtu pakhat erawh a chin hriat a la ni lo va. A chhungte leh Bengaluru-a a thawhna company nen pawh inbiak reng a ni,” tiin Secretary, West, Sanjay Verma chuan a sawi.
India hian ‘Operation Dost’ tia a hming vuahin Syria hnenah hian hmanrua, damdawi leh thil dang hrang hrang a thawn tawh a. Turkey hnenah pawh search & rescue team a thawn tawh bawk tih External Affairs Minister S Jaishankar chuan a sawi.
Turkey leh Syria-ah hian dam chhuakte zawn hna thawh chhunzawm zel niin ram pahnihah hian mi 11,000 chuang an thi tawh.
Ram dangte pawhin lirnghing tuartu ram pahnihte hnenah hian puihna chi hrang hrang an thawnte chu a thleng tan mek.
Mi zawn hna thawktute chuan ngawrh takin an la thawk zel a, mi chhan chhuah hun erawh a tlem zel a. Magnitude 7.8-a naa a sawi hnuah ni hnih a liam tawh a, khaw vawt tak hnuaiah in chim karah chhun zan zawmin an thawk mek zel a ni.
Turkish Red Crescent chief Kerem Kinik chuan chhiatna a thlen atanga darkar 72 chhung chu mi zawn leh chhan chhuah hna thawh a hautak leh a tul hun lai a ni tih a sawi a; mahse, ‘khaw awm danin a zir loh’ avangin duh ang tawk erawh chuan a thawh chak theih loh tih news agency AFP chuan a sawi.
Chhan chhuah hna thawktute chuan a tuar na ber, Hatay province-ah chuan in chim karah damin naupang an hmuh belh nasa a. He province-a khaw tam zawkah hian chenna in zawng zawng a chhe hlawm a ni.