Mizoram Women’s Senior Team player pahnih Lalhriatpuii leh Lalrinfeli te chu BCCI hnuaia tualchhung hmeichhe inelna lian Senior Women’s Inter-Zonal One Day Tournament-ah North East Zone tana khel tura thlan an ni.
Hyderabad-ah Pathianni atangin team paruk tel tur inelna hi khelh tan tur a ni a. Lalhriatpuii, Armed Veng leh Lalrinfeli, Hnahthial te hian Zirtawpni hian an team an zawm ang.
India rama tualchhung inelna a hmeichhe player tha thlan khawm inelnaah hian team paruk – North Zone, South Zone, West Zone, East Zone, Central Zone leh North East Zone te an khel dawn.
Anni pahnih bakah hian Mizoram Senior Women’s Team atangin PC Vansangzuali chu standby-ah dah a ni a. Non-playing staff lamah Joseph Lalhriatpuia chu North East Zone manager ni bawk ang.
Cricket Association of Mizoram Honorary Secretary Mamon Majumdar chuan, “India rama player tha thlan chhuahte zinga kan player-te an tel thei hi a lawmawm hle a, hei hian hma nasa takin kan sawnna a tilang. Anni pahnih bakah standy leh coaching staff thlenga Mizo pali an awm thei hian Mizoram hi cricket-ah hma kan sawn a, kan than chakzia a tilang bawk.” tiin a sawi.
North East Zone hian Pathianni hian NFC Ground-ah East Zone an hmachhawn anga, Thawhtanni-ah North Zone hmachhawn lehin Nilaini leh Zirtawpni-ah South Zone leh West Zone an tum anga. February 19, Pathianni-ah an inkhel hnuhnung berah Central Zone an hmachhawn ang.