Aizawl: Assembly thutkhawm neih mekah nimin khan thutkhawm hmasa leh tun tum thutkhawm inkara Mizoram assembly member ni tawh thi mi pathum sunna hun hman a ni.
House member ni thin thi ta an sunte hi – Lalhmingthanga, R. Khawpuithanga leh Lalrinmawia te an ni a. House Leader Zoramthanga’n an chanchin leh uina thu a sawi hnuah member dang ZPM group Leader Lalduhoma, Congress group leader, Zodintluanga te bakah Vanlalhlana, KT Rokhaw, Deputy Chief Minister Tawnluia, Lalchamliana, Dr. R. Lalthangliana leh Lalrintluanga Sailo ten uina thu an sawi bawk.
Nimina sun tak, deputy chief minister hlui, Lalhmingthanga hi November 2, 2022 zanlai dar 12:40-ah a chenna in, Khatla-ah kum 82 mi niin a thi a. Mizoram Union Territory inthlanpui vawi hnihna, kum 1978-a neihah MLA atan thlan tlin niin, Mizoram state a nih hnu nen tum 6 MLA-ah thlan tlin a ni.
UT leh state sorkarah department hrang hrang enkawlin minister a ni tawh a, kum 1998-a MLA inthlanpui neih zawha MNF leh MPC te thawkho sorkarah deputy chief minister a ni.
R Khawpuithanga hi December 15, 2022 zing dar 9:05-ah Trinity Hospital-ah kum 81 mi niin a thi a, ani hi kum 2003-a Mizoram State Assembly inthlanah MNF ticket-in Aizawl South II bialah thlan tlin a ni a, kum 2002 atanga 2008 MNF sorkarah chief minister political adviser a ni.
MLA hlui thi sun tak zinga mi, Lalrinmawia hi January 26, 2023 zing dar 9:10-ah kum 75 mi niin a thi a, ani hi kum 1987-a Mizoram State Assembly inthlan hmasa berah MNF ticket-in North Vanlaiphai bial-ah thlan tlin a ni.