Court of Special Judge (Prevention of Corruption Act)-in Tuirial Hydel Project siamnaa ram lak leh zangnadawmna pek thubuaia thiam loh a chantir mi parukte chu kum khat theuh tang tur leh Rs nuai 20 theuh chawi turin a hrem.
Aizawl District Court-a Special Judge (PC Act) Dr HTC Lalrinchhana chuan nimin khan Turial Hydel Project thubuaia thiam loh a chantir mi parukte hremna tur hi a puang a, pawisa chawi tur an neih loh chuan kum 10 dang tan belh turin a ti.
Court chuan hremna a tihchhuahah Tuirial Hydel Project siamna tura zangnadawmna felhlel tak thubuai a lak thu tak thu sawiin, ram lak thua zangnadawmna felhlel hmanga pawisa dawn chu Mizorama thil man sang uchuak tak thlentirtu pakhat niin a sawi a. Mizoram eibar sumpai bakah mi mal leh chhungkaw khawsak nunphung pawh a nghawng tel niin a sawi.
Thawhrimna rah mausama pawisa awlsam hmanga nun hman chu natna chi khat, khawtlang nun bakah mi mal rinna thlenga nghawng chhe tak nei thei a nih thu court chuan sawiin, politics hri chhe hmanga sorkarna fawng vuantu political party-ten thuneihna an hman sual chu India ram mipui rorelna that tawk lohna pakhat a nih thu leh leh hun kal tawh atanga zirchhuah a nih angin chumiin hlemhletna a hrin chhuah erawh chu court thuneihna hmanga chin fel loh chuan kawng dang a awm mawh hle niin a sawi bawk.
Court chuan Mizoramah sorkarin ram a lak dawnin vanduaithlak takin ram inlei leh hralh a hluar hle nia sawiin, chu chuan mipui sum awmze nei lovin mi hausa duham tak tute emaw pawisa ip-ah a luhtir thin niin a sawi a. “Ram hmasawnna hmelma a ni ngei a, chu chu thuneituten an do ngam a tul a, chutiang a nih loh chuan hma lam hun thim tak Mizoramin a hmachhawn mek,” a ti bawk a ni.