Aizawl: Aizawl khawpuia Assam Rifles ram luah chhunga mi mal ram neite LSC cancel tura Guwahati High Court-a Public Interest Litigation (PIL) an thehluh chungchangah Central YMA hruaituten nimin khan Revenue Minister Lalruatkima chu a pisa-ah an kawm.
Central YMA hruaitute chuan Assam Rifles ram luah chhunga LSC pekte cancel tura kum 2019 kumtir lama cabinet meeting-in hma lak a lo remti tawh chu lawmawm an tih thu an sawi a. Assam Rifles-ten an chhuahsan tur ram hi mi mal hnena pek leh sahthlak chu an rem tih ngai dawn loh thu sawiin, he ram hi Mizo mipuite tana thil tha leh rotling siam nan a tawp thlengin beih an tum tih an sawi.
Joint NGO Coordination Committee pawhin mi mal ram neite chu surrender turin an lo ngen tawh thu sawiin, helai hmuna LSC neite chu an LSC kawl reng lova sawrkara pe let turin an ngen tawh thute, an ngenna a hlawhtling lo nia an hriat vangin High Court-a PIL kum 2020 khan theh lut an nih thu leh rei loteah court hearing neih a nih an beisei tawh thu an sawi.
Central YMA hruaitute chuan ram neitute’n an neih dan hi a felfai lo hle nia an hriat thu sawiin, mi mal ram neite cancel-sak tura sorkarin hma a lak tawhnaah lawmawm an tih thu an sawi a, tun aia sawt lehzuala hmalak an beisei thu an sawi bawk.
Revenue Minister Lalruatkima pawhin sorkarin hma an lo lak tawh dan leh an bawhzui dante lo hrilh fiahin, mi mal leh pawl anga duhdan leh ngaihdante dah bo a, ram leh hnam tan a ni tih hriaa, ram leh hnam tana tha tur ber thlir chunga rilru zau tak helai hmuna ram neitute leh CYMA bakah sorkar pawhin a put theih a pawimawh thu a sawi a ni.