Aizawl: Siaha tlawhtu MNF Vice President Lalthlengliana’n social media lama an sawi ang lo takin a takah chuan Siaha-ah MNF bânsantu an lo tlem hle niin a sawi a. “MNF kan la tam filawr ber a, kum 2023 MLA inthlanah helaiah leh Zoram pumah MNF kan tling leh ngei dawn,” a ti.
Nimin zinga New Siaha Bazarshed-a street campaign leh hemi hnua MNF party office, Siahaa ‘woker’s meet’-ah te MNF vice president chuan he thu hi a sawi a. “A hmunah ka kalchilha, bânna an thehluh document-te ka zirchiang a, social media-a kan lo hmuh ang ni lovin Siaha-ah MNF bânsantute a takah an lo tlem hle,” a ti.
MNF vice president chuan nikuma May thlaa Mara Autonomous District Council (MADC) inthlanah MNF-in vote 13,796 an hmuh thu leh tuna MNF chhuahsantu chu mi 90 vel chauh an nih thu a sawi a. Tun hnaia bânna thehlut tam ber chu MDC inthlan laia an party phatsantu leh party enrollment-ah pawh telh loh, party atanga hnawhchhuah sate nia sawiin, “Min eptu tlem têin kan party beih nan, mipui tihchiai nan thu dik tawk lo an vawrh darh mai mai a lo ni,” a ti bawk.
Tuna bânna thehlut nia sawi zat aia tam fe MNF-a lawm luh mai hmabak an nei niin Lalthlengliana chuan a sawi a. Siaha district-a tun hnaia MNF chhuansantu chu tih tham an lo awm lo niin a sawi.
Siaha bazar-a public meeting an neiha police venhimna dil anga social medial lama thu thang awm pawh thu dik lo a nih thu MNF vice president chuan a sawi a. “Police-te kha MSO (zirlai)-ten Siaha DC sawn rih lo tura an duh avanga picketing neihnaa duty-te an ni,” a ti bawk.