- Mahmuaka Chhakchhuak
Mizoram Chapter, INTACH aiawha Delhi-a kal turin Pu Lalram Thanga IFS (Rtd) nena min ruat hlauh mai a, ka tan thil chhinchhiah tlak tak a nih avangin lawmawm ka ti hle mai.
Tichuan, Jan. 7, 2023 niah chuan dar 11;15 AM-ah Lengpui atangin Kolkatta panin IndiGo thlawhna chuan van sang takah kan thlawk a, kan thlawhna hi mi 186 leng a niin Seat 10D-ah thuin tukverh bulah ka thu hlauh chu vannei ka inti hle a. Ka hriat sual loh chuan Airhostess paliin min vil a, min vil hneh ngang mai. Kan thutna lane-ah chuan mi pathum thuin mizo nula nen hian Vai pa hi kan laitat a, ka thutpuite nen chuan kan inbe lem lo viau a, reilote kan han thlawh hnu phei chuan a tam zawk chu an muthlu deuh thup lehnghalin mut a chhuak duh bawk hle a, kei erawh meng fim karin tukverh atang chuan pawn lam ka thlir deuh reng a, mit a tlai viau thin tak nain chhum chunga thlawk kan nih avangin chhum hlir a hmuh theih chang a tam zawk mah awm e. Chutiang hlira kan thlawh hnu chuan dar 12;35 PM velah tluang takin Kolkata khawpui kan thleng a.
Netaji Subhas Chandra Bose Kolkata Airport-ah chuan Boarding ti lehin Gate number 23 lam chu panin Delhi lama kan thlawh leh hun tur hi dar 4 hnu lam daih a nih dawn avangin ka thu hahdam vang vang a, Mizo hmel hmuh tumin ka mit ka han len ruai thin tak nain ka hmu reng reng lo a, engemaw a awmzia ni ang, Mizo hi an awm miah lo nge ni ang te ka ti rum rum a, a chang leh Cell Phone khawihin thla ka la kual vel thin bawk a. Chutianga Phone ka khawih lai chuan massage rawn thlengin JM-IndiGo atang hian dar 3;37PM-ah chuan ka gate nghahna hmun chu an sawn thu min rawn hrilhin Gate number 106 a nih thu min rawn hrilh a. Phone lo khawih loin ngaihtha takin lo thu ta veng veng ila ka lo buai phah dawn hle mai tihte ka hriatchhuah phah a, tichuan Gate number 106 chu khawnge a awm tih chu a inziahna hmun hrang hrangah chuan en pahin ka kal zel a, ground floor lamah chhukin ka hmu ta a, heti chuan Thlawhna lo nghah chiah kan hmabak a ni tiin hahdam takin ka awm a. Nimahsela hemi hmunah ngei pawh hian Mizo pakhatmah ka hmu leh chuang lo a, tlem chuan a khawharthlak deuh a, a hnu deuh lawkah chuan Arunachali hmeichhe pakhat hi ka kiangah chuan a rawn kal a, Lunglei venghluna Biaktei a an em avang chuan Mizo a nih leh nih loh chu ka han zawt a, a ni chuan Arunachali a nih thu min hrilh a, a ticket min hmuh tir bawkin kan chuanna tur Thlawhna pawh alo in an chiah bawk avangin ka kiangah chuan ka thut tir a, kan inbe ta mawlh mawlh a.
Tichuan dar li a rawn rik dawn hnaihah chuan kan Thlawhna 6E2516 thlawhchhuah a hnaih dawn thu an rawn puang a, keini pawh inring takin kan lo awm nghal a. Nimahsela gate-ah chuan alo chhuah nghal mai theih hauh loh mai a, Zone 1 chu chhuah tir hmasa berin Zone 2 an chhuak leh a, chumi hnuah Zone 3 chu kan chhuak ve leh a, Zone number min pek hi Boarding pass-ah alo awm vek tih pawh ka han hriat chhuah thar phahin chinchang ka hriat phah leh ta. Chumi hnuah chuan Bus-in Thlawhna lam kan pan leh a, minute nga vel lek hnuah IndiGo Thlawhna bawkin Delhi lam pan turin kan thlawk chhuak leh a. Seat 5E pawh chu zawng buai tawh loin ka pan ding nghal a, amaherawhchu tukverh bulah thu tawh loin seat thum awma a laiah chuan ka thu ta zawk a. Dar 4;08 velah chiah thlawk chhuakin Delhi lam kan pan leh ta a.
Tluang taka thlawkin ka chuanpuite chu an muhil bawrh bawrh a, ka theih ang anga hma lam leh hnunglam ka han thlir kual fe pawh chuan Mizo hmel tumah ka hmu lo a, Airhostess pawh chu ka han zawtin ka zawn tir hial pawh chuan a hre thei mai bik loh avang chuan keimah chauh Mizo ka chuang em ni ang aw ka ti rilru a. Chuti chuan inthlahrung lo taka awmin kan thutna chunga boruak tih thawtna leh eng eng emawte chu ka han khawih kual vel a, dar ruk vel atang hian Airhostess pahnihin eitur chi hrang hrang an rawn nawr pheiin a duh chuan lo lam a, ATM Card Swipe-na keng nghalin chumi hmanga a man pek leh mai tur hi a ni a. Kan zawn a rawn thlen chuan a to ka ring tho nain ei ve chhin reng reng atan tiin Cup Noddle (Chicken) chu ka han lam a, tuilum nena min han chawhpawlh sak nghal bawkin, min pek pah chuan hawihhawm takin ‘Minute nga hnuah i ei dawn a nia aw’ a ti a, tui vawt no khat hi min pe bawk a. Ka han ei zawh a, a man pek ka tum chuan Rs. 300/- man a nih thu min hrilh a, kan khawvel hi chu sumdawn kan va thiam hlawm tak em ti rilru pah chuan ka pe a.
Chuti chuan tluang taka thlawk zelin Delhi kan thlen hma darkar chanve velah chuan Delhi kan thlen dawn hnaih tawh thu an rawn puangin seat belt hreng turin min rawn ti a, tukverh lian lo takah chuan dakin Delhi khawpui chu hmuhnawm ti takin ka thlir a, Delhi khawpui plan lo fuh zia ka hriat phahin van sang atangin alo mawi bawk hle mai tih ka hriat phah a, khawpui chhunga Lirthei tlanna tur an ruahman dante cchu fuh hlea hriain a ruala lirthei pasarih han tlan dul dulte chu hmuhnawm ti takin ka thlir zel a. Kum 1192 AD-a Muslim lal Shahabuddina’n thuthmuna a hman hma pawh khan Delhi-ah hian Hindu lal lo awm tawhin khawpuiah an lo hmang tawh bawk a. Mughal hoin kum 1526 atanga kum 1707 thleng an luah chhungah khan Delhi-ah hian sulhnu tam tak an hnutchhiah a. Nimahsela kum 1739-a Persia lal Nadir Shah chuan lainatna tel hauh loa a rawk tak chiamah chuan thil hlu tak tak, Peacock Thorne, Kohinoor leh thil hlu dang tam takte chu a la bo ta teuh a nih kha. Kum 1858 atanga British sorkar chak takin India a awh pawh khan Delhi hi khawpui pawimawh takah an hmang chhunzawm zel bawkin Mizoram thlengin min rawn awp a nih kha.
Tichuan, zan lam dar 6;59-ah chiah Delhi Airport kan rap a, run way-a tlan chhung leh Bus-a Terminal kan pan chhung leh Luggage lo chhuak nghah chhung nen chuan darkar khat lai a ni nghe nghe ang. Chumi hnuah chuan pawnah chhuakin Prepaid Taxi hmang chuan Kishangard lam panin kan tlan leh char char a, 10 Kms aia thui kan tlan hnuah chuan kan thlengin tuilum sa takin ka inbual fai nghal a, a nuam hle mai. Taxi fare pawh hi a tlawm hle mai a, Post paid ho chuan Rs. 1000/- an ti tlangpui a, Pre paid Taxi hi rate mumal tak nei sa an nih avangin kei pawh chuan Rs. 350/- chauh ka pe a ni.