French champion Paris Saint-Germain in kum bul an tan chhiat chu a la tawp hleithei lova. French Cup round of 16 paltlang zo lovin Olympique Marseille in 2-1 in an hneh.
Nilaini zanah Stade Vélodrome-ah club lian pahnihte hi an inkhel a. Marseille hian kum 2011 a Qatar Sport Investment in PSG an lei hnua a vawi thumna atan chauh an khingpui hi an hneh.
Marseille tan hian Alexis Sanchez chuan penalty atangin goal a khung a. Ruslan Malinovskyi chuan goal mawi a khung bawk.
Spanish defender Sergio Ramos chuan minute 31-naah Cengiz Under ti tlu in penalty a chawi a, PSG in si an phur hmasa.
Ramos-a’n a tihsual thawi dam nan halftime dawnah Neymar-a corner chu a tauh lut a. Brazilian forward hian metre 18 a hla atangin goal ban a pet per bawk a ni.
Mahse second half-ah Marseille in goal an khung belh zawk a. Atalanta atanga loan a an hawh Malinovskiyi chuan penalty area pawn atangin mawi takin an goal hnihna ‘half volley’ in a khung.
PSG tan Ramos bawkin huntawp dawnah goal khung mahse offside avanga pawm a ni lo.
PSG hian star player Kylian Mbappe chhawr thei lo mahse Lionel Messi leh Neymar te an khelhtir thei a. Kuminah vawi thum an tlawmna niin karleh hian UEFA Champions League-ah Bayern Munich an la hmachhawn dawn.
Marseille coach Igor Tudor chuan, “Inkhel tin a danglam avangin khaikhin vak hi ka duh lo, mahse tun tumah kan kheltha hle in ka hria a. Kan inkhel hnuhnung ber thlir phei kha chuan tha tak a ni. Kan khingpuite theihna ngaihtuah phei chuan player te tan pawh lawmna tham a ni.” tiin a sawi.
Inkhel dangah Lyon leh Lille te hun pangngaiah 2-2 in an inhnehtawk a. Penalty-ah 4-2 in Lyon an chak.
Lyon in an penalty pet te an khung vek laiin Lille tan Mohamed Bayo leh Timothy Weah ten an khung lo.