Thawhtannia lirnghing tuar, helhovin an awp lai, Syria hmarthlang lamah chuan UN atangin puihna a thleng ve ta a, Turkey atanga phurh luh a ni.
Thuneitute chuan lorry paruk hmangin damdawi hmanrua leh thil dangte chu Idlib-a Bab al-Hawa crossing kaltlanga phurh luh a nih ve tak thu an sawi.
Heng puihna hi chhiatna a thlen hmaa thleng tura ruahman zawk a ni a; mahse, lirnghing khan kawng leh inkalpawhna dang a tihchhiat nasat avangin a hunah a thleng thei ta lo a ni.
Chhanchhuah hna thawktute chuan mi 1,900 vel an thih thu leh in chim leh chhe karah mi eng emaw zat an la tang bawk tih an sawi.
Lir a nghin hma pawh khan heng lai biala mi maktaduai 4.1 zet chengte hi mi dang tanpuina ringa nung hram hram an ni sa a, a tam ber hi naupang leh hmeichhia an ni bawk.
Bab al-Hawa hi ramri kânna awm mek zingah UN-in heng lai biala puihna a pek thin phurh luhna kawng hawn chhun a ni a. Heng lai hmun hi jihadist tangrual leh Turkish sorkar thlawp hel, President Bashar al-Assad-a sorkar dotuten an awp lai a ni.
Tanpuina dangte chu Damascus kaltlanga lak luh a ni hlawm a, sorkar chuan ram dang atanga puihna hi a la lut tlem hle niin an sawi.
Ningani zing lamah khan Syria-a UN special envoy chuan lirnghing tuar na lai bialten puihna an dawn chu nunna chhanna tur khawp atan chuan ‘a la beitham hle’ tih sawiin puihna thawnte chu ‘politics khelh nan’ hman chi hauh loh a nih thu a sawi bawk.
“A rang thei ang ber, direct leh kawng tluang thei ang bera puihna kan mamawh nghal a. Engkim mai tak tak an mamawh a ni,” tiin Geir Pedersen hian Geneva-ah thuthar lakhawmtute a hrilh.
Pedersen-a hian UN hnuaia Syria tana humanitarian task force hotute a kawm a, an zingah hian Russia leh Iran pawh an tel a. Ram pahnihte hi kum 12 zet tual chhung indona awm meka Syrian sorkar thlawptute an ni a. Hetih lai hian Turkey, United States leh European Union pawh telin anni hian eptu lam an thlawp ve thung.
Iran, Iraq, Iran, Jordan, United Arab Emirates, Oman, Egypt, India leh Venezuela ramte chuan Syria hmar lam, sorkarin a awp hmunah puihna an thawn nual tawh a. Heng hmunah hian mi 1,250 vel an thi tih health ministry chuan a sawi.