- Ruata
India ramah South Korea company lar Hyundai-in an lirthei tlangzarh leh tur langsar ber leh hnaivai ber te zinga mi chu Hyundai Verna thar (new-generation) hi a nih hmel a. A hlawma tam tak an siamchhuah tanna tur hna chu thlaleh March-ah mai hian ani tawh dawn tih media report hrang hrangin an tarlang tawh a ni.
Hetianga a hlawma ‘production’ an tan tawh hi chuan hralhchhuah theih tura tlangzarh hun hi a hnu thla reiloteah a ni tlangpui thin a. Hetiang a nih chuan kumin chhung hian Hyundai Verna thar, chhuan thar model hi kan hmuh hman ngei a beiseiawm a ni. Hyundai Verna thar tur hi a codename-ah BN7i an hmang a, tuna Hyundai Verna kan hmuh mek nena khaikhin chuan a design leh kentel hrang hrangah te danglamna kan hmuh nual hmel.
Hyundai Verna hi Mizoramah pawh kan hman tam pawl tak lirthei a ni ve a. Tunlaiah phei chuan mid-size sedan huangah ngat phei chuan lei tam ber a ni hial awm e. Sorkar mi pawimawh te bakah mi malin an hmang nasa viau a. A mawiin a lian tha a, a hnawk lutuk bawk si lo a. A man lah to uchuak a ni lo bawk a, hei hian leitu tam tak a hip a ni tih hai rual a ni lo a. Car man to ve lam leh changkang pawl chu a ni tho na a, a man rualpuiah chuan lei hlawh tak pawl a ni a. Mizote pawn kan ngaina viau niin a lang a ni.
Verna thar chu le
Hyundai Verna hi chu sawi tawh angin a mikhual tawh lo a. Company lam atang pawhin a chi thar hi an tichhuak nasa tawh viau mai a. Tuna lo chhuak leh tur pawh hi a mawiin a changkang leh vet vet viau turah han ngai phawt ila. Hyundai chuan he sedan mawi tak hi thlaleh March atanga an siam tan hunah chuan an ruahman dan chuan kum khat chhungin 70,000 vel an siamchhuah theih an in beisei a. Tunah hian kumkhatah 40,000 vel an siamchhuak mek a ni. Heta kan hriat tur pawimawh deuh pakhat chu heng Verna tam tak te hi India rama mi vek tur an ni lo a, ram pawnah tam tak, India rama siam Verna te hi an thawnchhuak thin a, an thawnchhuak zui zel dawn bawk a ni. 2023 Hyundai Verna lo chhuak tur hi kumin kum chanve chho, April – June) chhoah hian an tlangzarh theih a rinawm tih report hrang hrangin an tarlang a, hei erawh chu company lam atangin a rawn chiang thuai turah ngai ila.
A chhung leh pawnah hian Verna thar hi a chhuak te nena khaikhinin a danglam nual dawn a. A khawl lamah pawh khawl thar, 1.5L turbo petrol engine chak tha tak mai a rawn nei thar dawn a, hei hian tuna petrol turbo khawl a hman mek, 120bhp power pechhuak thei, 1.0L turbo motor chu a rawn thlak dawn a ni. Hei bakah hian turbo ni lo, petrol khawl pangngai, naturally aspirated petrol engine an tih chu 1.5L tho hi a awm dawn bawk a. Hei hian idle start/stop technology a nei ang a, 115bhp power leh 144Nm torque a pechhuak thei dawn a ni. Transmission lamah chuan manual leh automatic gearbox duhthlan tur a awm leh ang a, tun dinhmunah chuan diesel engine a awm tel hmel loh a, company lamin thuthar an rawn nei thut a nih chuan thuhran ni se.
A ken tel tur lamah hian a hma atanga kan lo sawi thin tawh, Advanced Driver Assistance System (ADAS) hi a rawn neih thar tur langsar deuh a ni a. Hemi hnuaiah hian himna hmanraw changkang leh tha tak tak automatic emergency braking, forward collision mitigation, lane departure warning, lane keep assist leh thildang hrang hrang a awm ang a. A chhunglamah hian hmanraw changkang tak, dual screen setup a rawn nei dawn a. Pakhat hi infotainment system atan a ni ang a, pakhat hi instrument cluster atan a ni ang a, a infotainment system hian wireless Apple CarPlay & Android Auto connectivity te a nei dawn.
2023 Hyundai Verna hian Hyundai design language thar hlak a rawn put dawn avangin a landan pawh hi a danglam dawrh dawn a. Hetah hian parametric jewel design grille, Hyundai Tucson tharah te pawh kan hmuh ang chu a rawn awm tel dawn a ni. Full LED headlamp,a hma bumper thar, split taillamp leh thildang thlak danglam hrang hrang kan hmu dawn a ni. Tuna chhuak mek nena khaikhin chuan Verna thar lo chhuak tur hi a sei zawk ang a, a vang zawng pawhin a lian zawk dawn bawk a, a chhung pawh a zau lehzual dawn a ni.