MZP-in nimin khan Borapansury-a Zofate Chawlhbuk-ah special assembly hmangin Mizorama Chakma foreigner awmte hnawhchhuah an nih theihna tura hmalak an rel.
MZP President Lalnunmawia Pautu kaihhruaia MZP special assembly chuan Mizorama hnam dang dan lova sumdawnna kalpui mek dapchhuah zel pawh relin hnam dangte dan lova an sumdawnna Mizoram sorkarin a tihtawp theihna tura hmalak an rel bawk.
Mizo nunphung leh history-te a tam thei ang ber zirlai bua telh a nih theihna tura hmalak pawh MZP special assembly chuan an rel a. “Kum 2019-a Mizoram Legislative Assembly-in a pass tawh, Mizoram governor-in a la pawmpui loh, ‘The Mizoram Maintenance of Household Register Bill, 2019’ hi a hlawhtlin theih nan MZP-in hma la rawh se,” an ti.
Mizorama zirna in hrang hranga fee, hostel fee leh facility te a inmil em tih zirchiana a tul anga hma lak pawh an rel a. Nimin vek khan rorel inkhawm an zawh hnuah MZP hruaitute leh Borapansury VC te inkawmin, Borapansury leh a chhehvela Chakma foreigner a ruka Mizorama lutte chungchang leh hmalakho dan tur te an sawiho nghal bawk a ni.