Aizawl: Congress thalai (MPYCC)-in National Health Mission (NHM) hnuaia thawkten nikum December leh kumin January hlawh an la la lo nia sawiin, a rang thei ang bera pe chhuak turin Mizoram sorkar an phut.
NHM, Mizoram hnuaiah 4th grade atanga doctor specialist thlengin mi 2,200 chuang an thawk mek niin MPYCC chuan an sawi a. Mipui hriselna atana indaih lo taka an duty laiin an thlabi hlawh sorkarin a batsak thin nia sawiin, vanduaithlak an tih thu an sawi.
MPYCC chuan NHM hnuaia thawkte December, 2022 leh January, 2023 thla hlawh atana central sorkarin a tum ve tur (90:10) chu December 24, 2022-ah a release tawh nia sawiin chhuanlam siam lo tur leh tikhawtlai tawh lova NHM thawktute hlawh chu pe chhuak nghal tura Mizoram sorkar an phut thu leh a tulna apiangah NHM thawktute thlavang an hauh zel tur thu an sawi bawk.