North Korea chuan an khawpui, Pyongyang-a zana sipai kalrem lâm pui tak a buatsaihah nuclear missile eng emaw zat a pho chhuak a, heng zingah hian intercontinental ballistic missile (ICBM) thar pawh a tel ngei nia ngaih a ni.
Nilaini zana kalrem lâm hi an hruaitu, Kim Jong Un leh a nupui leh an fanu pawhin telpuiin an ram sipai din champha kum 75-na puala an huaihawt a ni.
An sorkar thupuanna, Korean Central News Agency (KCNA) chuan nuclear ralthuam keng tel hmanrua eng emaw zat an pho lang tel tih a tar lang a. Heng zingah hian tactical nuclear missile leh ICBM pawh a tel thu leh heng hmanruate hi North Korea-in hmelmate lakah ‘theihna insiam zelin, eptu apiang a hmachhawn theihna tur’ a nih thu a tar lang tel.
Sipai kalrem lâm pui tham tak hi Kim-a’n thuneihna chan leh nuclear power an neih lawm nana sipai leh civil mite an inbuatsaih mek laia huaihawt a ni.
North Korea ram vil rengtu, NK News chuan ralthuam an pho chhuah zingah hian solid-fuel ICBM pawh a tel niin a tar lang a. Hwasong-17 ICBM 10 vel pawh telin hei hian ‘tam tham zawka missile leh a kah chhuahna lian siam hna thawh mek’ a ni tih a lantir niin an tar lang.
“Heng thil hian missile technology thar an nei mek tih a tilang a ni,” tiin NK News chuan Twitter-ah a tar lang.
Kim-a hian coat dum leh fedora a inbel a, a nupui, Ri Sol Ju leh an fanu, Kim Ju Ae pawh telin an fanu hi vantlang hmaah a inlan tam lo hle. North Korean hruaitu hi a hlim hle a, balcony atangin a pu leh an ram dintu hmingchawia an phuah, Kim Il Sung Square-a a sipai leh an hmanraw chhawp chhuahte chu a thlir a ni.
Hmanraw pho chhuah zingah hian an ramin ICBM a neih len ber, Hwasong-17 pawh a tel a, hei hi mi thenkhat chuan ‘Monster Missile’ an ti a, hei tak hi miin a thar nia ansawi chu a ni.
“Hwasong-17 ICBM hi pair li a ni a, a dangte nen chuan a len zawngah a inang lo,” tiin International Institute for Strategic Studies-a defence researcher Joseph Dempsey chuan Twitter-ah a tar lang.
United States-a Carnegie Endowment for International Peace-a mi, Ankit Panda chuan he ICBM hi kum 2017 kalrem lâm khan hmuh a nih tawh thu leh la enchhin loh a nih hmel thu a sawi ve thung.
Khawvel ram tam zawkin ballistic missile an neih mekte hi liquid fuel hmang an ni hlawm a, kah chhuah a nih dawnin hun a duh rei deuh thin a. Solid-fuel ICBM an tih, tuna Pyongyong-a chhawp chhuah anga sawi hi chu nuclear missile zingah a hmuh a harsa bik a, a thawk na zawk bawk.
Solid-fuel hmang hi engtin nge tih leh engtikah nge North Korea hian an enchhin dawn tih leh an enchhin tawh em tih hriat a la ni lo.