Planning & Programme Implementation Department changtu, Chief Minister Zoramthanga’n SEDP atanga chhungkaw pakhat tana Rs. 50,000 an pek tur chu hlawhtlinpui tham a nih loh thu leh sum pek belh zel tum a nih thu house a hrilh.
Assembly session neih mekah nimin khan ZPM member, C Lalsawivunga zawhna leh member dangte zawh belhna chhangin chief minister chuan SEDP phase I, thawh khatna leh thawh hnihnaa Rs. 25,000 ve ve, a vaia Rs. 50,000 an sem tur chu hlawhtlinpui thamah an ngai lo tih sawiin, hemi avang hian sum chu pek belh zel an tum thu a sawi a. Sorkar kumthara phase II an kalpui leh turah phase I-a tanpuina dawng tawhte bakah mi thar, sing tel hnenah SEDP pek leh ngei an tum thu leh pek belh tur zat tak erawh sawi theih a la nih loh thu a sawi.
Chief minister chuan SEDP phase I, chhungkaw 60,000 huam turah chhungkaw paliin tanpuina sum an la dawng lo nia sawiin, chung mite chu tourism department hnuaia tourist guide trade thlang an nih thu leh training buatsaih hun laia training ve hman lote an nih thu a sawi a. Training chu buatsaih leh thuai beisei a nih thu leh SEDP phase I thawh khatna dawng tawhten a thawh hnihna an dawn tur pawh sanction vek tawh a nih thu a sawi.
Zoramthanga chuan family oriented SEDP atan implementing department pakua – agriculture, horticulture, AH&Vety, fisheries, land resources & water conservation, commerce & industries, UD&PA leh tourism departmen te an awm thu sawiin, heng department-te hian an hnuaia trade thlang chhungkuate chu an trade thlan mila hma an lak theihna tura training an buatsaih thin thu a sawi bawk.