Aizawl: Higher & Technical Education Minister Dr R Lalthangliana’n Serchhip College-a administrative building sak thatna turin SASCI hnuaiah Rs. nuai 650 ruahman a nih thu nimin khan house a hrilh.
Serchhip bialtu MLA Lalduhoma zawhna leh member dangte zawh belhna chhangin higher & technical education minister chuan Govt. Serchhip college-in nikum April 14-a NAAC ‘A’ Grade an hmuh an lawm tuma Chief Minister Zoramthanga’n college administrative building sak thatna tura Rs. nuai 650 pek a tiam chu SASCI hnuaiah kaltir a nih thu leh sorkar laipui pawhin a pawmpui tawh thu sawiin, state sorkar-ah administrative approval leh expenditure sanction buaipui mek a nih thu a sawi.
Higher & technical education minister-in member-te zawhna a chhanna chu Chief Minister Zoramthanga’n sawi belhin, a tirah he building sakna tur hian Rs. nuai 1,000 sen a tul rin a nih thu leh a hnuah college hotuten Rs. nuai 650-in a daih tur thu leh hemi atan hian project pawh an neih thu te an lo hrilh thu a sawi a. A lo intiam angin building sakna tur chu SASCI hnuaiah dahin, PWD department kuta dah a ni a, building sa tur contractor pawh an thlan fel vek tawh thu leh February 18-ah building sakna tur lung pawh phum tura ruahman a nih thu chief minister chuan a sawi bawk.