Inthlang mai tawh tur, Tripura-ah chuan campaign boruak a sang hle tawh a. Trinamool Congress chuan an theihna zawng zawng hmang mekin party chief Mamata Banerjee pawhin hun a hmang a, mipuite chu national party – BJP, Congress leh Left te hnawla anmahni thlang turin a sawm.
Trinamool hi Meghalaya-ah eptu party lian ber an ni mek a, Tripura-ah hian tumah thawhpui nei lovin bial awm zat zahve aia tlem deuh an chuh a, sorkar siamnaa party pawimawh tak nih an tum tih a lang.
Banerjee-i hian Tripura-ah hian insawh nghet hret hreta huang zauh a tum tih a chiang hle.
“Mi tinin Bangla model an sawi thin a, khawvel huap chawimawina kan dawng reng a. Rs. nuai 15 an pek dawn thu an hrilh cheuh va, chu pawisa chu in la dawn em? In LIC (Life Insurance Corporation) pawisa a kal vek dawn tihna a ni,” tiin a campaign-naah a sawi.
“Tripura hi kan hnuchhawn mai dawn lo va, rei tak atan inzawmna kan nei tawh a, Bengal anga tihhmasawn kan duh a ni,” tiin Banerjee-i chuan vantlang inkhawmah a sawi.
Party hian karleh maia inthlang tawh tur hmarchhak state-ah hian bung thar kai ngei an tum a. Tripura hi ram pum huapa inzar pharh tum, Trinamool tan rahbi hmasa leh pawimawh a ni.
Goa-a inzar pharh an tumna a hlawhchham tawh a, tun tumah hian bial 60 awmah bial 28 an chuh a. State unit hi Agartala-ah kum 1999 khan an din a. Kum 2016 khan Congress MLA parukin Trinamool hi an zawm a; mahse, a kum lehah BJP-ah an lut leh vek thung.
Kum 2018 inthlanah khan vote tla zawng zawng zinga 1% pawh Trinamool hian an hmu phak lo va, hemi tum hian BJP chuan hnehna an chang.
Tripura-a an indin hnuah Banerjee-i hian a party chu sawh ngheh tumin a bei nasa a. Bengal dawtah chuan Tripura hi mi cheng zinga Bengali an tam zawkna state a ni.
Hun rei lote Trinamool zawm zinga mi chu Sudip Roy Burman a ni a, ani hi politician hlun niin kum 20 chuang inthlana hnehna lo chang tawh a ni.
“Trinamool hi thil tidanglamtu an ni lo. Goa leh Manipur-a an chet dan kan hre vek,” tiin tuna Congress MLA ni mek, Burman chuan a sawi.
BJP pawhin sorkar siamnaa pawimawh tak nih tum, Trinamool chu engmah an ni dawn chuang lo tih a sawi.
“Tun hi Tripura-a Trinamool an inlan vawi khatna a ni lo. Kum 1999 atangin an awm tawh a, chuhtih lai chuan BJP nen an tang dun a. An lo lan apiangin inthlan result a chhuah hnuah an ka hupsak niin Kolkata-ah an let leh thuai thin,” tiin Tripura Deputy Chief Minister leh BJP hruaitu, Jishnu Dev Barma chuan a sawi.