- KIMA MIVAM
Kan thianpa titi hi han dah hmasa ila, “Kan In sakna turah rawt (iron rod) kan lei a, kan rawt lei chu loh theih lohna avangin kawng sir mai a dah ngai a nih avangin a him leh him loh thuah risk a sang duh hle mai. Chutih nak a lai chuan Rawt kan dah tukah kan Rawt dahna bul velah chuan vai thirchhe zawng, la valai ve tak pahnih hian thirchhia an rawn zawng zui a, kan In sakna ala fal ang reng si a, ngaih a tha duh lo hle a ni.”
Kum liam deuh ta ah khan, Aizawl veng pakhatah chuan, Ina mahni chauha awm nu pakhat chu Vai pakhat thilsiama vak vel chuan zen a tum a, an man hman si a, Veng chhung mi te pawh an thinrim viau a nih kha. Hetiang thil thleng hi langsar viau si lo hian a thleng fo lo maw? Tum khat pawh Sikulpuikawnah sawn Lapawchini zuartu vaipa chuan College zirlai thenkhat chu hnai takah din chilhin, an hnung lam atangin alo nek vel nasa mai nia! Veng kel til deuhah thil zuarin vak kual se, nu nau tan a hlauhawm duh awm mang e!
Mizote hi chuan kan bungraw neih that deuh pawh, zanriak tur chenin khawlaiah kan la dah ngam nual a, motor chenin; chutih mek lai chuan Aizawla veng tin deuh thawah hian veng chhunga thil zuarte, thirchhe zawng te leh thil chhe siam vak vel an tam ta hle mai. Veng kel til deuhah phei chuan, hmeichhia mahni chauha ina awm pawh a nuam lo thei viau ang. Tin, thil bo langsar vak si lo a awm zeuh zeuh thei tlat bawk; rukru thiam tak chuan mi pawisa pawh a vaiin a ru duh ngai lem lo, tlem a la a, remchang dangah a ru leh mai thin. Han in zawt kual chhin ila, pawi tham vak lo anga kan ngaih kan bungrua hi a bo fo tawh hial maithei.
Tin, Tunhnaiah khawchhak unaute an ram buai avangin hmuh tur an thahnem hle a, veng tin deuhthawah thil zuara vak kual hmuh tur an awm. Heng mi te hian veng chhungah awlsam takin ruihhlo an rawn vawrh thei tlat a ni, vai thirchhe zawng pawh hi an bang lo, an ti tlat.
Chuvang chuan, a bikin veng pawn atanga lo kal, kan veng chhung In tina vak kual te hi licence emaw permit emaw chu kan siam a tul viau awm e. YMA/LC ten an siam thei ang a, licence man hi an duh chuan pawisa an chawi tir ve ang. Chu licence nei te chauh chuan Veng chhungah mi Ina vak kualin thil an zuar thei ang a, tin, thil chhe siam leh eizawnna dang pawh permit nei chauhin an ti thei ang. Permit nei lo te chu veng chhung mi ina vah kual phal loh tur a ni ang. Delivery boy/girl te chu sawrkara permit nei sa an nih chuan chhinchhiahna tur ID emaw an nei tlangpuia, kan thil sawi hian a huam tel lo ang. Vengchung mi te chu veng mi an nihna angin vah kual phal thung ila, tichuan kan veng mi, eizawnna harsat deuh tan pawh thil zawrhna hun tha a ni thei ang a, thirchhe lam khawm leh thil chhe dang siam thlengin veng chhung miten sum hlawh ve dan kan nei thar dawn bawk a ni.