Aizawl: ZPM thalai hruaituten Mizoram Institute of Comprehensive Education (MICE) School, Tuikual North-a mi an tlawh thu sawiin, a sak danah thil dik lo tam tak an hmu niin an sawi.
ZPM thalai hruaitute chuan MICE school-a laboratory room tur chu bo niin an sawi a, a chhawng hnuai bera room tihpum a ni lo va, retaining wall pawh a awm zat tur a awm kim lo nia an hriat thu an sawi.
Retaining wall-in school building-a do vek tur nia a lan laiin, a then laiah beam chinah chauhte a do niin ZPM thalai hruaitute chuan an sawi a. Ruah sur huna tuihawk luanna tur leh tuichhe luanna tur hrim hrim tui luankawr hmuh tur a awm lo niin an sawi bawk.
School building chung berah tlâk dal/vawnban (railing) siam vek tur nia ngaih a nih laiin, hmun tam zawkah siam a ni lo niin ZPM thalai hruaitute chuan an sawi a. Hei hian naupang himna a tiderthawng hle nia an hriat thu an sawi.
Inthiarna (toilet) pawh a nih tur ang a ni lo nasa hlea an hriat thu sawiin, chhawng tinah naupangte zunram thiarna an nei tur nia a lan laiin chhawng thumnaah chauh siam a nih thu an sawi a. Hei pawh hi a tha tawk lo hle niin an sawi.
MICE school sakah hian rikrum thila chhuahna tur ‘emergency exit’ pawh siam a ni lo niin ZPM thalai hruaitute chuan an sawi a. Rualbanlote kalna tur siam tura ruahman a nih laiin a taka hmuh tur erawh a awm lo niin an sawi.
ZPM thalai hruaitute chuan MICE school sak dan chu a tha tawk lo nia sawiin, bangte pawh a lai leh a sira khi chat a tam hle niin an sawi a. Kawngkhar chokut-te pawh derdep tete an hmang niin an sawi bawk.
ZPM thalai hruaitute chuan, “MNF sorkarin contract hna chhe lutuk hlir min hlui hi mipui hmuhsitnaah kan ngai,” tiin, “CBSE school kan neih ve chhun leh zel pawh hetianga phuailuaia min hlui duh sorkâr kan hrawn hi vanduaithlak kan ti,” an ti a, MNF sorkarin zirna chu thu tak hla taka a ngaih lohzia a lang chiang nia an hriat thu sawiin, MICE school sak dan phuailuai lutuk chungchângah budget session neih lai ngeia insawifiah tura MNF sorkâr an phut thu an sawi bawk a ni.