Hri leng vangin inkharkhip kan kalpui a, zirna in phei chu a tuar nasa pawl an ni. Zirlaiten offline-in class an kal thei lo a, online hmanga zirna an chhunzawm a ngai; nu leh pa tam tak an mangang thung a, a titha peih leh peih lo inkar a hlat phah hle in a hriat bawk.
Nikuma MBSE in HSSLC result a tihchhuahah stream hrang hranga topper te chuan online-a class kal vanga an buai loh thu leh offline nen danglamna vak a awm loh thu an sawi a, an zirlai an zir dan a ngai reng niin an sawi hlawm.
Hetah tak hian keimahni leh chhungkua kan tanho thiam a tulin a hriat a, nu leh paten kan fate lehkhazirna hun tha kan siam thiam a tul hle niin a lang. Zirtirtu inthlahdah deuh deuhte chu an awm ngei ang, mahse school tinin result tha neih an duh a, zirtirtute pawh an tang hlawm viauin a lang a, zirlaite leh nu leh pate lam pawhin kan theihtawp kan lo chhuah ve a, hun kan inpek thiam a tul hle zawkin a hriat a ni.
Topper ho hian offline leh online bikah engmah danglamna a awm loh thu an sawi a, thiamsa leh hresaah kan ngai mai thei e. Mahse, an vawikhat zirna vek tho a ni, tumna tak tak nena zir chuan harsatna engmah a awm lo zawk tih kan hriat a tha. Zirna kawnga hmasawnna kan hmuh zel theih nan kan inchhung atang hian tan la ila, lehkhazirna hun insiam thiam ila, engpawh thleng se hmachhawn thiam zel turin kan zirlai i zir thin ang u.