Tuikual South-a AMC building sak, AMC Multi Complex tia a hming vuah chu a hming thlak leh building-a chanvo neih ve phutin nimin khan Tuikual South mipui an pungkhawm a. Building nimina hawn tura tih pawh thulh a ni.
Tuikual South khawtlang chuan an veng chhunga sak, AMC Multi Complex chu Tuikual South Multipurpose Complex tia a hming vuah leh garrage, market leh dawr atanga sum lut atanga zaa 50 chu Tuikual South Local Council-a chhun luh te; a chhawng chung bera hall chu Tuikual South chanvo-a dah te; management committee-ah Tuikual South Local Council aiawh mi pahnih tal dah te; chowkider atan Tuikual South mi ngei rawih te; garage, market leh dawr luah tura Ward XII atanga dil an awm chuan seat/dawr awm atanga zaa 80 hauhsak te an phut.
Tuikual South khawtlang hruaitute chuan he building-a chanvo neih ve an dilna chu nikum October 14 khan Aizawl mayor hnenah an thlen tawh tih sawiin, chhanna erawh tun thlengin an hmu lo niin an sawi a. An thil phutte tihhlawhtling lova a ruka building hawn tumah AMC chu puhin, khawtlang an lungawi loh thu leh chumi avanga pungkhawm an nih thu an sawi.
AMC-in building a sak tharna hmun chu neitu awm lo, LSC pawh awm lo niin Tuikual South khawtlang hruaitute chuan an sawi a. A hmaa ding thin UT building tia sawi mai thin pawh Tuikual South khawtlangin a thiah hna an thawk niin an sawi.
June 24, 2022 khan he building sak hnate enfiahin Aizawl Mayor Lalrinenga Sailo hovin AMC hotuten an tlawh a. Hemi tuma sorkar thuchhuahin a tar lan danin Assembly House chhehvelah phalna pek ni lo thil zuar an tam thu leh heng mite sawn chhuahna atan he building hi sak nia tar lan a ni.
He building sak hna hi central sorkarin a ruahman, AMRUT Mission hnuaia project, Urban local body (ULB) kaltlanga thawhna tur sum AMC-in a dawn hmanga thawh a ni a. AMRUT project-te chu ULB (AMC) thawh tur ni mah se AMC-a thawktu an indaih lo nia ngaiin state sorkarin a tam zawk thawh hnuah AMC-in AMRUT atanga a dawn Rs. nuai 296.62 hmangin parking lot tur a sa a, a hnuah sum tam zawk ruahman belhsaka pum a nih tak thu sorkar thuchhuah chuan tar langin, he building sakna atan hian AMC-in Rs. nuai 1,013 vel a seng dawn nia tar lan a ni bawk.