India chuana vawi khat nan a ram chhungah lithium thahnem tak awmna a hmu chhuak tih a sawi a, mineral vâng tak hi electric hmang lirthei tihkalna ber niin a ram chhungah hetiang lirthei hman theih beiseina pawh a tisang nghal.
Sorkar chuan Ningani khan Jammu & Kashmir-ah lithium tonne maktaduai 5.9 zet awmna hmuh chhuah a nih thu a puang a ni.
Tun thleng hian India hian lithium a mamawh ang chu Australia leh Argentina atangin a la lut thin a ni.
Lithium hi rechargeable battery tihnunna pawimawh tak niin hetiang battery hi gadget chi hrang hrang – smartphone leh laptop bakah electric car-ah pawh hman a ni.
Mi thiamte chuan tuna a awmna hmun hmuh chhuah a nih tak avang hian mi mal tana electric car hman tur chu a siam chhuah chu India hian kum 2030-ah chuan 30% zeta a tihpun theih tur thu an sawi a. Electric car-te hian carbon an pek chhuah ve loh avangin khawvel lum zel tur danna hmanraw tha tak a ni.
Union mines ministry chuan lithium hi Jammu & Kashmir-a Reasi district-ah, Salal-Haimana huam chhungah Geological Survey of India-in a hmuh chhuah thu a puang a ni.
Kum 2021 khan hetiang mineral hi tlem azawng chu chhim lama Karnataka-ah hmuh chhuah a lo ni tawh bawk.
A hmain sorkar chuan metal vâng tak hi a lak luh tam theih dan tur a dap tih sawiin India chhung leh pawn lam atanga tam zawk hman tur a awm theih nana neih theih dan a dap tih a sawi.
Mines Ministry Secretary Vivek Bharadwaj chuan India hian a thil mamawh leh tum nei tur hian ‘kawng hrang hranga beiin kalphung pawh a thlak’ tih a sawi.
Lithium pawh telin khawvel pumah metal vâng tak takte hi ram tam takin an mamawh dan a sang zel a, hei hi sik leh sa inthlak chak lutuk tihnep theihna tura khawvel tichhe lo chi thil hman tam duhna vang a ni.
Kum 2023 khan China chuan $ tluklehdingawn 1 hu zet inremna siamin Bolivia-a lithium reserve lian tak, khawvela hmun khata a awm tamna berna, tonne maktaduai 21 vel zet awmna buaipuina tur a ni.
World Bank chuan mineral vâng tak takte hi kum 2050-a sik leh sa inthlak nasa tihnep tuma beihna leh tumna a hlawhtlin nan chuan 500% zetin mamawhna a sang dawn niin a chhut lawk.
Hetih lai hian mi thiamte chuan lithium lai chhuaha a buaipui dan chu khualrel himna tichhetu a ni ve tho tih an sawi bawk.
Lithium hi lung chang tak atang leh lei hnuaia brine awmna hmun atanga lak chhuah thin a ni a, hengte hi Australia, Chile leh Argentina-ah a tam tham chu a awm.
Mineral laih chhuah nan hian fossil fuel an tih tam tak hman a ngai a, ram hmelhmang nasa taka tihdanglama laih chhiat a ngai a. A lak chhuah nan tui thahnem tak a mamawh a, boruakah carbon dioxide thahnem tak a pek chhuah a ngai bawk.
Tam tak a awmna hmun pakhat, Argentina pawh tui a that lohna hmun a ni a, lak chhuah nan tui tam tak an hman a ngaih si avangin ram luah hmasatuten an duh lo hle a, ram an tihchhiat bakah tui an tivang em em niin an sawi a ni.