Aizawl: School Education Minister Lalchhandama Ralte-in mi mal leh kohhran enkawl sikul aiin sorkar enkawl sikulah zirlai an tam zawk niin house a hrilh.
State assembly thutkhawm mekah nimin khan zawhna leh chhanna hunah Aizawl North I bialtu MLA Vanlalhlana zawhna leh member dangte zawh belhna chhangin education minister chuan sorkar sikulah zirlai 1,28,927 an awm thu leh mi mal leh kohhran enkawl sikulah zirlai 1,26,314 an awm thu a sawi a. Sorkar sikula zirlai tam zawkna chu 2,613 a tlin thu sawiin, eductaion department-in a chhinchhiah china Mizorama sikul naupang awm zawng zawng chu 2,55,341 an nih thu a sawi.
Education minister chuan academic session thar, 2023-2024 atangin sorkar enkawl sikulah uniform inang tlang hman a ni dawn nia sawiin, uniform inang tlang hman rawtna chu HRD board-in sorkara a thlen hnuah department hotute bakah zirtirtu pawl hrang hrangte nen sawihova pawm tlan a nih thu a sawi a. “Uniform rawng tur pawh zirtirtu pawl hrang hrangte duh thlan a ni,” a ti.
Uniform inang nei tura ruahmanna siam a nih chhan sawiin education minister chuan naupang intluktlanna atan, discipline tha zawk an neih theihna atan te, awlsam zawka naupang hriathran theihna tur te, awlsam zawk leh man tlawm zawka uniform lakkhawm a nih theihna turte bakah kum laklawha an nu leh pate eizawnna emaw, chhan dang vanga insawn ngai emaw tan a awlsamna zawk dawn vang a nih thu a sawi.
Minister chuan primary sikul zirlaiten kekawrtlawn leh pawnfen dumpawl leh kamis var banbul an ha ang a, middle sikul zirlaiten kekawrtlawn leh pawnfen light grey leh kamis var banbul, high school leh higher secondary te chu a inang – kekawrtlawn leh pawnfen dum leh kamis var bantlawn an ha dawn tih a sawi a. Primary atanga higher secondary thlengin pheikhawk dum bun tur a nih thu sawiin school bag, t-shirt, necktie leh badge te erawh chu sikul thuneitute duh dan anga kalpui tur a nih thu a sawi bawk.