MI LAINAT THEIHNA
Mipa tam zawk hi chuan eng ang pawha boruak a lo pik pawhin chû boruak pik ti êng theitu, mi lainat thei tak hi an duhin an rilru ah an awm deuh zel. Zirchianna aṭanga an sawi danin hmeichhia, mi lainat thiam leh hlim hmel pu hram hram theite hian mipa an hip thei bik a ni. Hlim hmel putna hian thil ṭha zawk beiseina leh mahni inrintawkna te mi a siamsak a, a dawngtu tan a hlu.
THIL THA LAM THLIR THIAMNA
Mipa leh hmeichhe inkawpna hi a romantic riau a, mahse chû romantic, ti romantic-tu chu thil dang ni lovin hlim huna hlim taka nui bawk bawk thei leh thil a kal tluan lem loh hun pawha (fiam thu thianghlim nena) mahni chhas-te tinui theite hi an ni. Chutiang mi chuan mipate hi an hip thei riau niin an sawi bawk a. Chutiang atan chuan hmeichhiate chuan an rilrua an vei te, an ngaih pawimawh zâwng te pawh an vawn a, nun puitling an zir chhuah zel nana hmang ṭangkai thiam tura ṭan an lak a ngai.
TALENT TIPUNG THEI MI
Mipa tam zawk hi chuan an thil tih tum an tih hlawhtlin nana fuihtu leh tiphûrtu hi an ngaina em em zel a. An rilruah hmun an chang sang ber zel. Mipate’n an thil tum ropui tak, boruaka leh suangtuahnaa la awm an han sawi a, mit meng zau deuh kawk khawpa lo dawngsawnga, lo ngaihvenpuitu hmeichhia chuan pasal zawn an harsat dawn lo reng reng.
THIANTE KAWM THIAM
Mipate pawh hian anmahni bula awm chawt a, an ṭhiante hlamchhiahtu hmeichhiate hi an ngaina lem lo zawk zel. Chu ai chuan an ṭhiante pawh kawm thiam, titi pui leh hlim taka siam thiamte hi an ngaina zawk a ni. Mahse, an ṭhiante leh hmeichhe inkar chu ‘ṭhian satliah’ (pangai chin chiah) a ni tur a ni. Chutianga mipa (ngaihzawngte) leh bakah an ṭhiante pawh hlim taka kawm thei mite chuan mipa an hip na bik zawk zel.
RINNGAMNA
Rinawmna ti pawhin kan sawi thei ang chu – mipaten hmeichhia an rin ngam chuan an rilru ah an lian hle tihna a ni. Rin tlaka insiamna hian zahawmna te, mipa tan fuihtu ṭha nihna te, kawppuite thlir danah mi huaisen leh tum ruh nihna te, mahni dinna hmuna ding nghet tihte a kawk a. Chutiang hmei-chhiate chuan an chhehvela mipate an hip hneh bik ṭhin.
INRINTAWKNA
Nula chuan engnge a tih ang, engtin nge a awm ang, etc. engkim mai a bialpa duh dan leh a bialpa kuta a dah vek chuan mipa rilru ah ngaihnepna a siamsak duh hle. Mihring inkara inhmangaihna hian ngaihsanna rilru a keng tel tlat tih hriat tur a ni. Min ngaisang se, tih beiseia mawi lo tak leh khaw lo taka awm tur chu a ni der si lo (chutiang mite’n ngaihsan an hlawh loh zia chu kan hre vek). Chu ai chuan hmeichhiate pawh hian ṭha nia an hriat chu sawi sela, dinpui ngam sela, chu chu mipa hipna ṭha tak a ni zawk. Entirnan, movie en turin ṭhian za hova kal an rawt a. Ṭul i tih loh chuan ṭul i tih loh chhan, fel fai fiah takin sawi mai la. I sawi ang chuan awm ngei bawk la. Mahni inrintawkna nei mite hian mipa an hip thei bik leh bawk.
MAHNI STYLE
Hmeichhe tam takin an ṭhelh fo chu mi style mawi tak tak an lak hian mipa an hip dawn emaw an inti hi a ni. Mi style mawi tak tak emaw i laka, an incheidan vel i zir khan i mawi viau pawh a ni mai thei. Mahse, mipate khan khatiang style kha an lo hmu tawh a. A style siam chhuaktu chu mawi an ti pawh a ni mai thei, mahse mawi an ti dawn chuang lo che; ninawm leh ngeiawm, zahpuiawm lamah an kal zawk thin.