Thawhtannia lirnghing na takin a sawi atanga darkar 90 vel zet a liam hnuah Turkey-ah nau piang hlim leh a nu chu dam taka lak chhuah an ni.
Ni 10 mi chauh, Yagiz-a hi Hatay province chhim lama in chim sawp nuaih atangin hima lak chhuah a ni.
Video thehdarhah chuan naute hi zan thim laiin lak chhuah a ni a, tual chhung chanchinbute chuan ‘mak tak a ni’ tiin an tar lang hlawm.
Lir a nghin hnuah ni li lai khaw vawt takin a hmeh zui leh tawh avangin dam chhuak hmuh beiseina a tlahniam mek zel.
Beiseina hniam hle tawh mah se Turkey leh an thenawm, Syria-ah chuan mi zawn leh chhanchhuah hna thawh erawh chhunzawm reng a la ni tho.
Nau piang hlim, Yagiz-a hi thermal blanket hmanga tuam niin ambulance-ah enkawl zui tura dah luh a ni.
A nu erawh hlanga zawn a ngai a, an dinhmun a tha em tih erawh hriat zui mai theih a la ni rih lo thung.
Istanbul Mayor Ekrem Imamoglu-a team tirhin an chhanchhuah nufa an ni a, mayor chuan Samandag khuaa chhanchhuah an nih thu Twitter-ah a tar lang.
Nufa lak chhuahna hmun atang tho hian mipa pakhat pawh lak chhuah a nih lai video chu Reuters news agency-in a dah chhuak a; mahse, nufa nena inkungkaihna nei an ni em tih erawh hriat a ni lo.
Thawhtanni tuka magnitude 7.8-a na lirnghing avang hian mi 21,000 chuang an thi tawh a, a tam zawk hi Turkey-a mi an ni a. A hnuah nghing nawn vawi tam tak a thleng leh tawh.
Lirnghingin thil a tihchhiat leh nunna lak bakah hian chhiatna dang kalpui a nei ang tih hlauhna a awm mek a. Mi tam takin chenna tur in an nei tawh lo va, tui, tuialhthei leh electric a awm lo bawk.
Khaw vawt na takin a hmet zui bawk si a, mi tam takin nunna an chân belh mai hlauhna a lian hle a ni.