Thawhtanni kal taa lirnghingin a sawi hnuah Turkey-ah chuan chhan chhuah hna thawktu pawl pathum chuan buaina chhuak avangin an hna thawh a khaihlak tih an sawi.
Lirnghing avang hian Turkey leh Syria-a thi chu mi 28,000 an tling tawh a, hun a liam tam tawh avangin dama mi lak chhuah tur an awm beiseina a tlem tial tial a, hetih lai hian mak tak taka chhanchhuah pawh an awm ve mek zel bawk.
German rescuer leh Austrian army chuan ralthuam keng lo pawl inkara buaina chhuak avangin Inrinni khan mi zawn hna an thawh chu an chawlhsan rih a ngai tih an sawi.
An zinga pakhat chuan ei tur tlakchham a nih tan avangin venhimna dinhmun a derthawn mai a hlauhawm tan hle niin a sawi.
Turkey president chuan dan bawhchhiate hrem an nih theih nan emergency power a hmang mai dawn tih a sawi.
Austrian sipai thupuangtu chuan Inrinni zing lamah khan Hatay province-ah eng pawl nge an nih hriat loh pahnih an intihbuai avangin Austrian Forces Disaster Relief Unit chuan an hna thawhna hmun kalsanin inhumhim nan an base camp lamah pawl dangte nen an insaseng tih a sawi.
“Turkey-ah hian ho hrang hrang karah inthikna leh inmil lohna a awm tan mek,” tiin Lieutenant Colonel Pierre Kugelweis chuan a sawi a. “Himna awm lohna hmunah chuan nunna chhan tuma chet chhuah ngawt a remchang lo,” a ti bawk.
Austrian sipaiten an hna an chawlhsan hnu rei vak lovah hian Turkish sipaite inrawlhin an veng a, an hna pawh an chhunzawm leh thei tih Austrian defence ministry chuan a sawi.
Search & rescue group pakhat, ISAR German branch leh Germany-a Federal Agency for Technical Relief (TSW) pawhin venhimna tha tawk a awm loh avangin an hna an chawlhsan tih an sawi bawk.
“Ho hrang hrang intihbuaina a chhuak mek zel a, silai pawh hmeh puah a ni,” tiin ISAR thupuangtu, Stefan Heine chuan a sawi.
ISAR operations manager Steven Bayer pawhin ei tur, tui leh beiseina a tlem telh telh dawn avangin venhimna chu a derthawng telh telh dawn niin a sawi lawk.
“Venhimna dinhmun hi uluk takin kan thlithli mek zel a ni,” a ti.
German rescue team-te hian Turkish thuneituten a him tih an chian hma chuan an hna an chhunzawm dawn rih lo tih an sawi niin Reuters news agency chuan a tar lang bawk.