- Lallunghnema, Charity Lodge
Kan thupui kan luh chilh hmain tun hnaia consumer-te harsatna kan buaipui dan eng eng emaw ka sawi hmasa dawn a ni.
Consumer politics ruih chilh hi channa chu a ni vek lem lo. Hmanni lawk khan Mizo saum tui sipisial tak ka dawng nawlh mai a.Ka lawm hle! A dangdai ve em a,kan bawl phuan lawk a ni. Thil dangah erawh, ‘laap,’ a awm lo. Hetianga consumer complain kan buaipui hian lawmthu sawina pawisa kan la ngai lo , ‘ukil pawh kan nih loh hi kan eizawnna pawh a ni lo, lawmthu sawi erawh kan phut’ ka ti mai mai thin.Ka at vang ai mahin ka lawmpui vang a ni mah zawk awm e.
Tin,hetiang hi a ni a, chawlhkar thum zet liam taah khan mobile phone part thlaksak chungchanga customer lungawi lo pakhat chuan Sunday zan ber kherah min lo phone teh tlat a.Ani hi, tun hma atang tawh a ka lo hmel hriat thin a ni a. A hming nen erawh ka hmeh bel thiam lo thung !
Thawhtanni zingkara lo leng tura kan inthlah fel angin kan in ‘Charity Lodge,’ corruption tel lova ka sak ngei maiah chuan ka nau nen chuan green tea kan unaunu Marli min pek gren tea ngai mai chu ka lo dawmpui a. Ama Mizo saum siam ngei min pe ve teh ngawt a! Ka lawm tak zet mai.Thla kan lakpui zak zak mai. Chu saum chu a uih tui phian! A rim a thiang kak mai! Chaw ei pawh a ti tui narawh e!
Chu ka inleng pa thil chu kan buaipui ta zar zar a. A phone siamsaktu kan va bia, chumi hnuah ani, ka inleng pa chu ka va be leh! Anni mobile phone repairing centre neitute chuan “Chutianga phone kan siamsak, a part, a thar kan thlaksak hnu pawha, a la that loh chuan a part thar kan vuahsak chu lo dah se, a ta hlui hi la chhuak leh se, G-pay- in a pawisa chu kan pe dawn nia” an ti a. Mahse, thianpa chuan “Min thlaksak lo, ka en reng alawm, an dawra ka kal tulna ka hre lo” a ti bur mai si a. A buaithlak hle! Ani ka inleng pa berin an dawra ka kal a tulna ka hre lo, a tih bur avang chuan tih ngaihna a vang ta hle zawng a ni.
Thil buaithlak dang leh chu hetia kan thianpa hian a harsatna min hrilh hma hian Consumer Court-ah complaint a lo thehlut der tawh a. Chutia kan inbiak tawn chhen lai chuan mobile siamtu hnenah ‘love letter’ a thleng der tawh. Love letter ka tih hi, Consumer Commission hnen atanga notice,Court hmaa insawifiah tur hriattirna a ni. Consumer-in service provider(mobile repair-saktu) a khinna a ni. Hetianga consumer commission lehkha an hmuh hian boruak a dang chho leh zual a. Mobile siamtute pawh an nem leh zual a ni. Kan buaina ber chu, part ‘,thlak lo, thlak,’ tih a ni a. A tawi zawngin sawi mai ila, kan thawhpui,consumer activist,Pu Rinawma’n(a hming ka sawi ngawt mai a, min hrethiam em ang chu – llh) thahnem ngai taka a beihna zarah he thil hi chinfel a ni ta a ni. Harsatna tawk,mobile phone siamtirtu oawh hi a huaisennah ka fak hle a.Hlauhna leh zamna nei lova,service provider a khing ngam hi ropui ka ti a ni.
Pu Rinawma hi,officer lian pensioner a ni a,awm mai mai thiam lo, che reng mai, tih tur dap reng, buai reng mai, consumer te chauh lo pawh ram mipui tana thawk reng a ni a. Hetiang mi hi an vang hle a,kan mamawh hle si a ni. Political party luhchilh lo va, mipui rawngbawlna a thawk tlat hi entawn tlak a ni a, a thlamuanthlak hle bawk a ni.
Tun hnaiah on-line shopping induh tawk tak tak ka tawng ta zauh zauh mai. Bungraw chah thleng dik lo leh bungrua tihchingpen thuahte mi tam tak harsatna an siam thin a, an siam mek bawk. Hetianga customer te rap bet zawnga an awm thin hi an at vang leh an sual vang a ni. Customer tel lo chuan an sumdawnna leh eizawnna a tawp thei tih lo hre mawlh rawh se.
Consumer complaint kan dawn zingah chuan hei hi kan buaipui mek chu a ni. Nu pakhatin pheikhawk a chah a, a man pawh a pe tlak nghal a. Mahse chu pheikhawk chu an chah ang a nih loh avangin return request a siam a. Company chuan return request chu an lo phalsak a; mahse Aizawl a delivery ti tute chuan an lo remti lova. Hetianga an indawrnaa a lungawi loh avangin pheikhawk chahtu chuan min pun a ni ber a.Kan inbiak mek laiin ka phone hman number pawh chu an la duh ta lva,min blocksak a ni. Hetianga sumdawnna kalpui ching hi an hlawhtlin theih ka ring lo hial a ni.
Kan thupui chu hei hi a ni-Times of India- in a tarlan danin Jaipur District Consumer Commission chuan an dawr nghaktu pakhatin customer pakhat Rs. 2/- a laksak avangin Bata India chu Rs. 10000/- a chawitir a ni thu hi a ni. Hetiang hian Saptawngin a inziak a ‘ -Leading shoe maker Bata India Limited was fined Rs. 10000/- for charging one of its customer for printed carry bag mentioning the name of the shoe company.
Bata has been fined by the Jaipur District Consumer Disputes Redressal Forum after a customer Mahesh Parek complained about being asked to purchase a carry bag while paying for items according to a report by Times if India.
Complainant purchased the item on 16/4/2016 for Rs. 399/- the stone then added Rs. 2/- to the bill. Consumer Forum asked Bata India to provide free paper bag to the customer in future.” Hetah hian zir tur kan nei. Customer huaisen nih ve hi. Huaisenna tel lo chuan hlawhtlin theih a ni lo.
Mission Vengthlang pa anga huaisen, Republic Veng pa anga consumer right vei! Chawlhhmun pa anga mipui chanvo leh dikna humhalh duh. Dam Veng pa anga mahni hmasial lo, consumer te hmangaihtu, Venghlui pa anga consumer te tana ke pen chak leh consumer te harsatna sutkian duh, hetiang mi hi Isua zir tur zat tal awm belh leh ila, kan zia ngei ang!
I thil leinaah harsatna i nei em?
Service i hmannaah i lungawi lo em ?
Fimkhur takin engkim ti thin rawh.
I fimkhur loh avangin i hloh thin.
I ngaihsam vangin thil dik lo
I en liam mai mai thin?
I ration lak buk a tling em?
I Gas lak buk a tling em?
Home delivery-in Gas i la thei em?
Thil thar lo thleng tur chu
Lawm takin lo hmachhawn rawh.
Dawrkaite lakah duap kai ngai suh.
Taxi pute lakah rate dik phut ngam rawh.
A tawp ber atan chuan,bungraw chhia leite,buk tling lova thil leite,rate leh fare dik lo hman te,fakna dik lo,hlei hluakte hian ram mipui tuarna a ni tih lo hre mawlh tawh ang che.
Harsatna tawk kan pui thei.
Ka inpeih reng e.