Aizawl: Commerce & Industry Minister Dr. R. Lalthangliana chuan Inrinni khan a bial chhung, Hnahthiala DC pisa building thar sak mek a tlawh.
Dr R Lalthangliana hian Hnahthial DC office building thar sak mek chu kumin August thlaah thawh zawh hman a duh thu leh strong room pawh kumin MLA inthlanah hman theiha peih fel a duh thu thawktute a hrilh.
Hnahthial DC Complex-a district thar hriatrengna lungphunna tur hmun tlawh bawkin kumin April thla chhung ngeia phun zawh a duh thu a sawi.
Convention Centre hmun hma laih mek pawh enfiah nghalin thawktute hnenah a tira sakna tura sum ruahmanah lirthei dahna tur ruahman ni lo mah se, Hnahthial district tan rotling tha a nih dawn avangin lirthei dahna tur hmun hma tha tak siam turin a hrilh bawk.
South Tuipui bialtu MLA hian Hnahthiala DRDA office thar tur building sak zawh mai tur te, UD&PA office building sak mek te leh Integrated Industrial Promotion Centre (IIPC) building sak tur hmun hma laih tan mek te a tlawh bawk a ni.