Turkey President Recep Tayyip Erdogan chuan an ramah hian chhanchhuah leh puih hna thawh a chak theih nan thla thum awh tur emergency a lo puang tawh a, Hatay-a buaina chhuak hi sawi chhuak chuang lo mah se dan bawhchhiate lakah sorkar chu na takin a che zel dawn tih a sawi.
“Emergency kan puang tawh,” tiin Inrinnia chhiatna a thlenna hmun a tlawhnaah a sawi a. “Hemi awmzia chu tun atang chuan mi tupawh, mi rawk leh thil ru emaw, mi ru bo emaw an awm phawt chuan sorkarin a duh danin a ti ang,” a ti.
Sorkar chanchinbuin Inrinnia a tar lan dan chuan rukruk avangin mi 48 man an ni tawh tih an tar lang tih AFP chuan a tar lang a. Silai tam tak manin pawisa, thil hlu, tlereuh leh bank card pawh tam tak man a ni.
Antakya-a in chimnaa thawk tlangval pakhat, kum 26 mi chuan, “Dawr leh car tukverh leh hungna tichhiain an lut a ni,” tiin Reuters a hrilh.
Turkish police chuan Gaziantep leh Sanliurfa province-ah in chim chungchangah mi 12 an man tih an sawi bawk a. An zingah hian contractor-te pawh an tel tih DHA news agency chuan a tar lang.
Vice President Fuat Oktay chuan Inrinni zana thuthar lakhawmtute a kawmnaah in chim avang hian man belh an awm ngei a rinawm tih a sawi a, arrest warrant 113 lai tihchhuah a ni.
Turkey-ah hian in 6,000 chuang chimin Erdogan-a sorkar hian in sak dan en tha se heti zat chim leh thi an awm loh rinna a lian hle.