Real Madrid in record an siamlai chu chhunzawmin a vawi nga na atan FIFA Club World Cup an chawi a. 5-3 in Saudi Arabia club Al Hilal an hneh.
Inrinni zana Rabat, Morocco a final inkhelah Los Blancos tan Vinicius Junior leh Federico Valverde ten goal hnih ve ve an khung.
UEFA Champions League champion lai Blancos hi champion tura rinkai zawk chiang takin an ni a. Asia champion lakah hian a tir minute 20 chhungin goal hnih a hma hruai nghalin Vinicius leh Valverde ten goal an khung hma hle.
Mahse Saudi club zinga final khel hmasa ber Al Hilal an ngawi bik lo. Minute 26-naah Moussa Marega hmangin goal khat an khung ve a. Team pahnih inkar a zim sawt.
Second half tan tir lamah erawh Madrid bawkin goal hnih zing takin an khung leh a. Striker damkawr Karim Benzema chuan an goal thumna khungin Uruguayan midfielder Valverde chuan an goal li na a khung ve leh.
A tawp thlengin Al Hilal erawh an ngai lo. Atletico Madrid forward hlui Luciano Vietto goal hnih khung inkarah Vinicius-a’n Real tan goal a khung a. Inkhel zawh dawn thlengin a hmuhnawm tluan.
FIFA Club World Cup-ah European club-te chungnunna a kal zel a, he tournament hnuhnung 10-ah Europe club hlir an la champion.
Real coach Ancelotti chuan, “Hma kan sawn zelin ka hria. Tlarhnungah tihsual neuh neuh chu kan nei, mahse a hma lamah theihna sang tak kan nei. Kan player inhliamte an lo kir leh tan tawh a. He trophy hian inrintawkna lian tak min siamsak ang.” tiin inkhel zawhah a sawi.