India chuan mi 29,000 chuang zet thihna thlen tawhna, Turkey leh Syria lirnghing tuarte puihna turin Inrinni khan sipai thlawhna lian dang a tirh belh leh a. Thlawhnaah hian tonne 35 chuang zeta rih hmanrua leh pawimawh dang tam tak phurh a ni.
Indian Air Force (IAF) thlawhna, C-17 Globemaster hian Inrinni zan khan Syrian khawpui, Damascus a pan a. A thil phurh thenkhatte hlan a nih hnuah Adana a pan zui lehnghal dawn tih thuneituten an sawi.
Thawhtannia lirnghing rapthlak tak an tawrh hnuah tuna thlawhna thlawk leh hi India-in puihna hmanrua phur thlawhna a tirh pasarihna a ni.
Thuneitute chuan C-17 thlawhnaah hian Syria puihna tur bik tonne 23 leh Turkey tan tonnes 12 vel a phur tih an sawi a. Syria hnena thawn zingah hian mutbu, generator set, solar lamp, tarpaulin, blanket, emergency & critical care medicine leh chhiatna thlenna hmuna hman chi hmanraw dang a tel.
Turkey hnena pan tur zingah hian army field hospital leh National Disaster Response Force (NDRF) search & rescue team tirh tawhten an hman tur thil hrang hrang a tel a. Damdawi hmanrua – ECG machine, patient monitor, anaesthesia machine, syringe pump, glucometer, blanket leh a dang a tel bawk.
Indian Army mi 99 chuan Turkey-a Hatay province-ah, Iskenderun-ah khum 30 awmna field hospital an din a, hliam tuar tam tak enkawl tawh leh enkawl mek an ni.
Field hospital-ah hian damdawi bakah critical care specialist leh mi zai thiam an awm a. Operation theatre, X-ray machine leh ventilator an inchhawp bawk.