Congress President Lalsawta’n sorkarna an siam chuan sorkar hnathawkte hlawh, dearness allowance (DA) pung leh pensioner te hlawh chu a hun takah pek a nih tur thu a sawi.
Inrinni khan Aizawl Press Club-ah thuthar thehdarhtute kawmin he thu hi MPCC president chuan a sawi a. An party-in sorkarna an chan lai khan sorkar hnathawkte duhsakin an hlawh chungchangah 6th pay commission recommendation pawh a nihna anga pawmin, kum khatah vawi hnih DA pung chu sorkar remchan dan anga an pek thin thu a sawi a. “Sorkarna kan chang a nih chuan hei hi chhunzawm kan tum,” a ti.
Kum tam tak lo hman tawh, Old Pension Scheme pawh hman leh ngei an tum thu Lalsawta chuan sawiin, “Old Pension Scheme hi Rajasthan, Himachal Pradesh, Chhatishgarh Ieh Jharkhand state te angin keini pawhin hman leh kan tum a. Finance minister ka lo nih tawhna atangin a theih a ni tih ka hre chiang,” a ti bawk.
Sorkara regular-a thawk mekte leh a nghet lova thawk, provisional employee zawng zawngte chu tangkai zawka hman dan ngaihtuah an tum thu pawh Lalsawta chuan a sawi a. Anni hi ram rohlu ni leh zual tur leh ram leh a mipuite hi ram rohlua din chhuak tura an hmanruate an nih thu a sawi.
Congress president chuan Mizoram sorkarin leiba a ngah chhan chu sorkar sum enkawl dan a fel loh vang nia sawiin, hei hi sorkar sum a nih angin dik taka hman loh vang leh planning commission a awm tak loh hnua India ram sum enkawl dan danglam ta hriat fuh loh vang nia a hriat thu a sawi a. Sorkar sum chu mimal sum enkawl anga enkawl theih a nih thu a sawi.
Lalsawta chuan Lunglei Municipal Council inthlan lo awm tur denchhenin Lungleia bial pathum vil turte a puang a, Lunglei West vil turin PC Lalthanliana, Lunglei South vil turin Dr. RK. Lallianthanga leh Lunglei East vil turin Joseph Lalhimpuia te ruat an nih thu a sawi a. Mipuite chu inthlan tihautak lo zawnga chea candidate-te sum tawktarh hnawl ngam turin a sawm bawk a ni.