Tui kan mamawhna a sang zel a, tui thianghlim kan la mamawh nasa telh telh dawn bawk. Hetih lai hian kan tui tlan lian ber Tlawng lui erawh kan duat tawk lo hle thung a, bawlhhlawh leh leivung paih an la bang thei lo.
Heti reng kan ni dawn a nih chuan tui bill thlenga kan chawi tam a la ngaih thu department hotute chuan an sawi a, a tihfim/faina lamah sum a kal tam zel dawn vang a ni.
A kum telin tui an sem chhuah tur chu tihthianghlim a ngai nasa zual ta hle tih department hotute chuan sawiin, “Hetiang renga tui tihthianghlim nana sum senso a hautak zual zel a nih chuan tui bill tipung lo thei lo dinhmunah kan la awm thei,” an ti a, Lui tui a bawlhhlawh avanga harsatna an tawh thinte sawi bawkin, tui an pump dawn hian bawlhhlawh then fai phawt a ngaih thin thu leh tui an pump-ah leivung a tam chuan tanky-te a tihbalh nasat chuan tanky tihruahte a ngai tih sawiin, hengte avang hian tui pump chhuah a khaihlak a, fur lai pawhin tui sem pawh a khaihlak phah hial thin tih an sawi.
Hetiang hi kan dinhmun a nih tawh avangin kan leivung leh bawlhhlawh paih kawngah hian fimkhur ila, a paihna hmun tur dik taka siama paih hi i ching thar ang u. Hnam mawlzia leh zilh lo fa ang maia chet hi ching lo ila, a tuartu chu keimahni tho kan ni leh thin tih pawh kan hriat thar deuh deuh a tul hle.