Aizawl: Thubuai hrang hrang rang zawka chin felna, National Lok Adalat chu ram chhung hmun dangte rualin Mizoram hmun hrang hrangah Inrinni khan huaihawt a ni a, thubuai 317 chin fel a ni.
Samkhai zawk leh sum sen ngai lova thubuai chinfelna, Lok-Adalat hi State Legal Services Authority kaihhruainain Mizoram-a district pariatah huaihawt a ni a. Gauhati High Court, Aizawl Bench-ah pawh Lok Adalat hi huaihawt a ni.
Tun tum Lok Adalat-ah hian district hrang hrangah thubuai hrang hrang ngaihtuah tur 695 a lut ni a, thubuai 317 chu chin fel a ni.
Thubuai ngaihtuah tur lutte hi mi mal pawisa inpuktir, rul leh thei lo thubuai te, bank loan rul tha thei lo thubuai te leh civil case hrang hrangte an ni a. Lok-Adalat-in a rel theih thubuaite chu criminal compoundable case-te bakah civil case chi hrang hrang an ni a, hetiang rorelna hi lung in intantir zawnga kalpui a nih ve loh avangin thubuai neitute tan rorelna duhawm tak nia ngaih a ni.