Ultimate Fighting Championship a No. 1 pound-for-pound fighter ni turin lightweight champion ni lai Islam Makhachev chuan hnehna a chang a. Alexander Volkanovski chu UFC 284-ah unanimous decision in a hneh.
Pathianni zinga UFC 284-ah lightweight title inchuhin champion lai leh UFC featherweight champion Volkanovski te Perth, Australia-ah an inhmachhawn a. Round nga chhung inbei tawk viau in, ding chung leh chhuata an inhmachhawnnaah te kut an inthlak tawn nual.
A tawpah erawh judge pathumten 48-47, 48-47, 49-46 in Makhachev an chak tir zawk.
Champion leh champion intum an ni satliah lova, pound-for-pound fighter rankings a sang ber zawnna a ni bawk a. Makhachev a hlawhtlin avangin a teammate thin Khabib Nurmagomedov hnung a zui.
A chak hnuah Makhachev chuan, “Min tan lo a nih pawhin thil a danglam chuang lo. Khawvela fighter tha ber ka ni mek. Ka lawm e.” tiin a sawi a.
“Thahrui a ngah hle a, min nawr reng a tum bawk. A style a danglam deuh a, a che rang a, thahrui a ngah bawk. Chhuata inbeihah pawh hma a sawn hle, a inveng thiam bawk. Fight tha tak a niin ka hria, ka tan tawnhriat tha tak a ni.” tiin a sawi.
Volkanovski hian round nga na tawp lamah Makhachev hi a kut dinglam in a hnek tlu a, a tawp thleng bawhzui thei mahse a chak hman lo.
Interim champion thar
UFC 284-ah Volkanovski hmachhawn thei tur pahnih an intum a. UFC interim featherweight champion zawnnaah Yair Rodriguez chuan Josh Emmet a hneh.
15-3 MMA record nei Rodriguez hian round hnihnaah Emmett hi triangle choke hmangin a hneh a. Unification bout a nei thei tawh dawn.