Bihar chief minister hlui, Lalu Yadav-a chu December thlaa a kal thlaka zai a nih hnuah dam takin Inrinni zan khan ram khawpui berah a lo let leh ta.
Rashtriya Janata Dal (RJD) president hi Singapore-ah hian hun eng emaw chen enkawl a nih hnuah a kal thlaksak a ni a, tunah hian haw thei khawpin a dinhmun a tha tawh a ni.
Delhi-ah hian a fanu, Rajya Sabha MP Misa Bharti-i’n a lo dawngsawng a. A fanu bulah hian Delhi-ah hun eng emaw chen a khawsa zui rih dawn niin an party chuan an sawi.
A hmain a fanu dang pakhat, a kal thlakna tur pawh petu, Rohini Acharya-i chuan Twitter-ah a pa chungchang leh India-a a haw leh tur thu hi a lo tar lang tawh bawk.
India-a Yadav-a a haw leh tur hi Rohini-i’n a sawinaah hian tute pawhin a pa chu enkawl tha turin a ngen a ni.
“Fanu ka nih anga ka tih tur chu ka hlen a. Ka pa hi a dam tawh a, a tan theihtawp ka chhuah,” tiin a pa chu inenkawl uluk tura a duh thu a tar lang.
Kum 74 mi ni tawh, Yadav-a hi a kal lam fel lo avangin hun eng emaw chen a buai a, a kal chu thlak mai tura rawn a ni a. Rohini-i hian a kal pakhat pe turin thu a titlu ta a ni.
Kal thlak hi December 5 khan tihfel a ni.
Bihar chief minister hlui hi an state a hruai laia ran chaw leina thubuaiah sum tam tak ei ruk avanga thiam loh chantir niin lung in tang mek a ni a, a hriselna dinhmun hniam avang hian bail-a chhuah lailawk mek a ni.