Aizawl: Lengpui daia MSSC-REC Motorsports racing track siam mek chu Inrinni khan Sports Minister Robert Romawia Royte-in tlawhin eastern India-ah a hmasa ber tur a nih thu a sawi.
Sports minister chuan racing track chu ram tan a hlu dawn hle tih sawiin, deptt officer leh contractor te pawhin theihtawp chhuah se a duh thu a sawi a. J. Lalhmingliana te chhungin Joseph Zosangliana Complex tia koh tak ram zau tak an pek avangin lawmthu a sawi bawk.
Mizoram State Sports Council (MSSC) Secretary John Tanpuia’n a sawi danin he project atana sum Rs nuai 750 chu REC-in an CSR fund atanga an pek niin, SASCI atangin Rs nuai 800 hmuh a ni bawk a. Racing track chu km 2.17-a thui, meter 12-a zau niin, international standard-a siam tum a ni.
Sports minister hi official leh Mizoram Motorsports Association hruaitute leh Lengpui VC & NGO hruaitute bakah MLA pathum – Lawmawma Tochhawng, Er H. Lalzirliana leh Dr K. Pachhunga ten an tawiawm bawk.