New Zealand chu thlipui leh ruahpui thawkin a nuai mek laiin mi sang telin power an nei lo.
Cyclone Gabrielle hian Inrinni zan zankhuaa khan Australia-a Norfolk Island a nuai hnuah New Zealand hmar lam kil a nuai leh mek a, a chakna erawh hloh tawhin cyvlone a ni tawh lo va, storm chauh a ni tawh.
Khawchin zirtute chuan Auckland leh Northland-ah thlipui na tak leh ruah tam tak thawkin ruah mm 200 leh thli pawh darkar khata km 130 thlenga chak a tleh dawn niin an sawi.
Tawm himna tur, evacuation centre siam a ni a, mi chengte pawh ruah leh thlipui dawng turin an inring mek.
Pawn chhuak thei lova awm a hlauhawm avangin ni thum tla tal ei leh in inchhek tura tih hriattirna chhuah a ni bawk.
Cyclone atanga storm-a chang ta, Gabrielle thawh hma lawk hian Auckland khawpui hi ruah nasa tak sur avangin tui a lian nasa hle a, emergency puan pawh la kalpui reng a ni.
Sandbag thahnem tak sem niin hemi hmang hian chenna inte chu huala tui lian laka him nana tih a ni.
Air New Zealand chuan tual chhunga thlawhna thlawk tur tam tak an thulhtir.
Norfolk Island hi sq km 34 awrh chauhva zau, New Caledonia leh New Zealand inkara awm niin thuneitute chuan thlipui leh ruah thawk avanga kawnga thil tlu leh thil hnawk awmte then hna an thawk mek zel a, power pawh pek leh thuai tumin an bei bawk.
Emergency Management Norfolk Island chuan, “Inthen fai hna thawh mek niin power pawh hmun thenkhatah pek leh tawh a ni,” a ti.
New Zealand-a MetService chuan thli hi thingkung leh power line tichhe thei khawp leh ruah pawh tui lian leh lei min thlen thei khawpin ni rei vak lo a la thawk dawn tih an sawi lawk.
Prime Minister Chris Hipkins chuan, “Mipuite hnena hriattir kan duh ber chu khaw awm dan uchuak tak thawk mek hi ngai thutaka lo inbuatsaih tura tih hi a ni,” a ti.
“A tul huna chea hmanraw mamawh zualpui ken tur inring tur leh chhuahna tur hmun him buatsaih tur a ni,” tiin a sawi.