Tripura assembly inthlan chu ni thum chauhvin a dang ta a, member 60 awmna assembly member thlan turah hian sorkar lai, BJP chu Left-Congress tang dun leh tun hnaia din thar, Tipra Motha bakah Trinamool Congress nen an inkhing dawn.
Union Territory an nih atanga state an nih hnua Tripura inthlan hmasak ber hi January 21, 1972 khan neih niin Congress chuan bial 41 lain thuneihna an chang a, Sukhamoy Sen Gupta chu chief minister a ni.
Left Front an tiha a khaipa ber, Communist Party of India-Marxist (CPI-M) chuan tun thlengin chief minister pathum nei tawhin a ngah ber an ni a. Nripen Chakraborty (1978-1988), Dasarath Debbarma (1993-1998) leh Manik Sarkar (1998-2018) te an ni.
Sarkar-a khan ni 7,303 zet chief minister pisa a luah a. March 11, 1998 atanga ni tanin March 9, 2018 thleng, BJP-in thuneihna an chan thleng a ni.
Kum 1977 assembly inthlanah khan CPI-M chuan bial 51 zet lain bial la tam ber record an siam a, hei hi tun thleng pawhin khum a la ni lo.
Kum 2013 inthlanah khan Sarkar-a kaihhruai CPM chuan vote tla zinga 48.11% zet an hmu phak a, state an nih hnua inthlana party pakhatin vote a hmuh hnem ber a ni.
BJP chuan kum 2018 khan a vawi khat nan Left Front hnehin sorkarna an siam a. CPI-M thuneihna chhuhsakin bial 36 an la a, Congress chuan MLA an nei zo lo va. A hma zawngin BJP hian assembly-a thu tur an la nei ngai lo va, a hma lam zawng chuan CPI-M leh Congress an inbei ber thin.
Radhika Ranjan Gupta kha ni 101 chhung chief minister a ni a, ani hi chief minister pisa luah reilo ber niin CPI-M-in kum 1977-a Janata Party nena an thawhhona an tihtawp avanga bâng a ni.
February 16 inthlan turah hian vote nei mi 28,13,478 an awm a, kum 2018 aiin 9%-in an tam zawk a. Mi 65,044 chu a vawi khat nana vote thlak tur niin an zinga 34,704 chu mipa niin 30,328 chu hmeichhia an ni.
Kum 2013 inthlanah khan vote 93% zet a tla a, hei hi India rama assembly inthlan awm tawh zawng zawnga vote a tlak that ber tum a ni a. Tripura-ah vek hian kum 2008 khan vote 91.22 tlain hei pawh hi a hun laia record a ni a, 2013-ah hian an khum a ni.
Inthlan hnuhnung ber, kum 2018 khan vote 193-a inhnehna awmin he state inthlana inhnehna tlem ber a ni a. CPI-M candidate Pravat Chowdhury chuan vote 19,046 hmuin Indigenous People’s Front of Tripura aiawha ding, Dhananjoy Tripura chu Manu bialah a hnenah a. Tripura hian vote 18,802 a hmu ve phak a ni.