Cyclone Gabrielle-in New Zealand hmar lam a nuai avangin chhungkaw 58,000 velin power an nei lo mek.
Thuneitute chuan ruah tam tak leh thli na tak a thaw dawn nia sawi lawkin thlawhna thlawk tur za chuang thulhtir an ni bawk.
Gabrielle hian North Island a hnaih mek laiin hmun thenkhatah chuan emergency puan a ni.
A hma lawkin Auckland leh a chhehvel chuan rah tam tham tak dawng tawhin tui a lian a, mi pali lai an lo thi tawh.
Emergency Management Minister Kieran McAnulty chuan Thawhtannia thuthar lakhawmtute a kawmnaah sorkar chuan an ram chanchina a vawi thum nan chauh ram pumah emergency an puan thu a sawi.
Emergency hi Auckland telin hmar lam region pangaah puan a ni bawk a. Emergency puan hnuaiah hian tual chhung thuneituten thil hlauhawm thleng thei hmachhawn chungchangah thuneihna sang zawk neiin zin veivah phalna titawpin mi puihna chungchangah pawh thuneihna tam zawk an nei thei.
Meteorological agency Metservice chuan Auckland hmar lam, Whangarei khawpui chuan darkar 12 liam ta chhungin ruah mm 100. zet an dawn tawh thu a sawi.
McAnulty chuan thlipui na tak leh ruah tam tak an dawn dawn avangin Thawhtanni kha a khirh hun lai a ni dawn tih a sawi a. Northland region chu darkar khata km 140-a chak thliin nuaiin Auckland Harbour Bridge pawh darkar khata km 110-a chakin a nuai bawk.
Khaw awm danin a la zir loh em avanga hnathawh nan a la him loh avangin power grid siam tha tur chuan ni a la ngai deuh dawn tih a sawi bawk.
Cyclone-in khawmual a kai tawhna hmunah chuan thing a tlu a, kawng a chhia a, power line a chhe nasa hle bawk.
Auckland leh North Island-ah chuan sikul leh tual chhung sorkar hmunte chu an khar a, loh theih loh thil a nih loh chuan tumah zin chhuak lo turin tih an ni bawk.
Thlawhna 509 zet zin tur thulhtir an nih avangin Air New Zealand-a chuang tur mi 10,000 chuang chu an buai hle a. Thawhlehni atang chuan an thlawh leh theih tawh beisei niin carrier hian tual chhunga thlawk tur bik thlawhna dang 11 a tirh belh ang.
Prime Minister Chris Hipkins pawh Auckland-ah thlawhna zin thulh avangin a tangkhang nia sawi a ni a, cabinet meeting pawh online-in an neih phah nia sawi a ni.
Hipkins-ah hian a hmain mipuite chu khaw awm dan thlirlawkte chu ngai pawimawha inbuatsaih turin a lo ngen tawh.
Cyclone thawk mek hi chawlhkar tlem te chhunga Auckland leh North Island ten an tawrh vawi hnihna a ni.