Sri Lankan sorkarin kum 14 zet kal taa thia a lo puan tawh, LTTE chief Velupillai Prabhakaran chu a la dam a, a la hrisel tha hle niin Tamil Nadu politician hlun tak, Pazha Nedumaran chuan Thawhtanni khan a sawi a. Vantlang hmaah pawh a inlan leh thuai dawn tih a sawi bawk.
Liberation Tigers of Tamil Eelam (LTTE) dintu, Prabhakaran-a hi thliarkar rama Tamil mite chenna tur ram a din theih nana rawlrala chein May 18, 2009 khan Sri Lankan army-in beihpui an thlaknaah Mullivaikal-ah thah anga sawi a ni a. Hetih lai hi Lankan sorkara Mahinda Rajapaksa a president lai a ni.
Kum 14 zet a liam hnuah World Tamils Confederation president Nedumaran chuan Thanjavur-a thuthar lakhawmtuten an kawmnaah, “LTTE chief Prabhakaran chu a la dam a, a lo inlan thuai ang. Khawvela he thu puan a ni thei hi kan lawm a, Tamil Eelam tana a hmachhawpte pawh puan thuai a ni ang,” a ti.
Politician hlun tak chuan, “Sri Lanka-ah Sinhala-ten par an chhuan mek laiin Rajapaksa sorkar chuan hniam lam a pan mek a, hei tak hi Prabhakaran-a lo lan hun atana tha a ni,” tiin LTTE chief la dam thu a puan hun chungchang a sawi bawk.
Sri Lankan sorkarin kum 2009-a Prabhakaran-a a thi tih a puan khan a ruang thlalak leh video tam tak thehdarh a ni a, hengte hi a hnuah mi tam tak chuan a hnuah a lem a nih thu an sawi a. Mi dangte pawhin LTTE hruaitu hi khawvel dan bawhchhiain, a inpe tawh an kap hlum niin an sawi bawk.
A thi tia puan a nih lai hian Prabhakaran-a hi kum 54 mi a ni.
Nedumaran-a hian a la dam tih a sawi bak a sawi zui duh lo va, LTTE hruaitu awm mekna pawh a sawi lo.
Prabhakaran-a hi kum 1991-a thihchilh bomb hmanga Sriperumbudur-a Indian Prime Minister Rajiv Gandhi thahnaah pawh a mawhphurtu bera puh a ni a. Sri Lanka-ah pawh tualthah thubuai tam tak neiin LTTE pawh firfiak pawla chhal an ni.
Amah leh a hote chhut chimih tuma an beih lai khan Sri Lankan sipaite chuan mihring dikna chanvo an palzut nasa hle niin sawi a ni bawk.